கர்மவீரர் காமராஜர் அவர்களின் நினைவுதினத்தை முன்னிட்டு, அவரது தியாகங்களையும் மக்கள் நலச் சேவைகளையும் நினைவுகூர்ந்து முன்னாள் அமைச்சர் எஸ்.பி. வேலுமணி மரியாதை தெரிவித்துள்ளார்.
ஏழை, எளிய மக்களின் பசியைப் போக்கி, பள்ளிக்கூடங்களைத் திறந்து, கல்வி விளக்கேற்றிய கல்வி வள்ளல் காமராஜர் என அவர் புகழாரம் சூட்டியுள்ளார். நீர்ப்பாசனத்திற்கு முக்கியத்துவம் அளித்து, பல அணைகளைக் கட்டி விவசாய வளர்ச்சிக்கு வழிவகுத்ததுடன், தொழிற்சாலைகளை உருவாக்கி இளைஞர்களுக்கு வேலைவாய்ப்புகளை ஏற்படுத்திய அவரது பணிகளையும் நினைவுகூர்ந்துள்ளார்.
பொதுவாழ்வில் தூய்மை, நேர்மை ஆகியவற்றைக் கடைப்பிடித்து, எளிமையின் இலக்கணமாகத் திகழ்ந்த காமராஜரின் வாழ்வு தலைமுறைகளுக்கு வழிகாட்டியாக அமைந்துள்ளதாகக் குறிப்பிட்டுள்ளார். அவரது நினைவுதினத்தில், நாட்டிற்காகவும் மக்களுக்காகவும் அவர் ஆற்றிய சேவைகளையும் தியாகங்களையும் போற்றி வணங்குவதாக எஸ்.பி. வேலுமணி தெரிவித்துள்ளார்.
