அக்டோபர் 11ஆம் தேதி டெல்லியில் இருந்து சென்னை வரும் பிரதமர் நரேந்திர மோடியின் பயணத் திட்டம் வெளியாகியுள்ளது. அன்று காலை 8 மணிக்கு டெல்லியில் இருந்து விமானத்தில் புறப்படும் அவர், காலை 10.55 மணிக்கு சென்னை வந்தடைகிறார். பின்னர் விமான நிலையத்தில் இருந்து ஹெலிகாப்டர் மூலம் பூந்தமல்லி ஹெலிபேடுக்கு செல்கிறார்.
சென்னை மெட்ரோ ரெயில் இரண்டாம் கட்டத் திட்டத்தில், பூந்தமல்லி–வடபழனி இடையிலான மெட்ரோ ரெயில் சேவையைப் பிரதமர் தொடங்கி வைக்கிறார். இவ்வழித்தடத்தில் கட்டுமானப் பணிகள், சோதனை ஓட்டங்கள் மற்றும் பாதுகாப்பு ஆய்வுகள் முடிக்கப்பட்டு, ரெயில் சேவையை இயக்குவதற்கான ஒப்புதல் பெறப்பட்டுள்ளது. காலை 11.30 மணிக்கு பூந்தமல்லியில் இருந்து போரூர் நிலையம் வரை பிரதமர் மெட்ரோ ரெயிலில் பயணிக்கிறார்.
மதியம் 12 மணிக்கு போரூர் மெட்ரோ நிலையத்தில் இருந்து காரில் புறப்பட்டு சென்னை ஐ.ஐ.டி. வளாகத்திற்குச் செல்கிறார். அங்கு ஸ்டார்ட் அப் நிறுவனங்களின் நிறுவனர்களுடன் கலந்துரையாடுகிறார். மேலும், மூன்று தேசிய நெடுஞ்சாலைத் திட்டங்களையும் இந்தியன் ஆயில் கார்ப்பரேஷன் நிறுவனத்தின் திட்டங்களையும் தொடங்கி வைக்கிறார்.
சென்னை ஐ.ஐ.டி. வளாகத்தில் உள்ள ஜலகண்டேஸ்வரர் கோவிலில் பிரதமர் சாமி தரிசனம் செய்கிறார். பிற்பகலில் இசைஞானி இளையராஜாவின் இசைச் சிறப்பு மையத்தையும் தொடங்கி வைக்கிறார். இந்த இசை ஆராய்ச்சி மையத்திற்குக் கடந்த 2024ஆம் ஆண்டு அடிக்கல் நாட்டப்பட்டதுடன், இளையராஜாவின் இசை நிறுவனத்துடன் புரிந்துணர்வு ஒப்பந்தமும் மேற்கொள்ளப்பட்டது.
தொடர்ந்து, சென்னை கன்வென்ஷன் சென்டரில் நடைபெறும் நிகழ்ச்சியில் பிரதமர் மோடி பங்கேற்கிறார். சென்னையில் பல்வேறு நிகழ்ச்சிகளை முடித்துக்கொண்டு, மாலை 5 மணிக்கு விமானம் மூலம் டெல்லி புறப்படுகிறார்.
