தீபாவளி பண்டிகையை முன்னிட்டு பட்டாசு வெடிப்பது தொடர்பான கட்டுப்பாடுகளில், முழுமையான தடையோ அல்லது நாள் முழுவதும் கட்டுப்பாடற்ற அனுமதியோ இல்லாமல் சமநிலையான அணுகுமுறை தேவை என்று உச்ச நீதிமன்றம் தெரிவித்துள்ளது. நீதிபதிகள் எம்.எம். சுந்தரேஷ், பி.பி. வராலே அடங்கிய அமர்வு இந்த விவகாரத்தை விசாரித்தது.
முழுமையாக பட்டாசுகளுக்குத் தடை விதிப்பது பண்டிகையைக் கொண்டாடுவோரின் உணர்வுகளைப் பாதிக்கக்கூடும் என்றும், அதேநேரத்தில் 24 மணி நேரமும் பட்டாசு வெடிக்க அனுமதித்தால் குழந்தைகள், முதியவர்கள், நோயாளிகள் உள்ளிட்டோருக்கும் சுற்றுச்சூழலுக்கும் பாதிப்பு ஏற்படும் என்றும் நீதிமன்றம் குறிப்பிட்டது. எனவே, குறிப்பிட்ட நேரத்தில், அனுமதிக்கப்பட்ட வகை பட்டாசுகளை மட்டும் வெடிக்க அனுமதிக்கும் வழிமுறையை உருவாக்க வேண்டும் என தெரிவித்தது.
மத்திய அரசின் பரிந்துரையைத் தொடர்ந்து, குறிப்பிட்ட நிபந்தனைகளுக்கு உட்பட்டு புதிய தலைமுறை இணைக்கப்பட்ட பசுமைப் பட்டாசுகளை (joined green crackers/லடி) தயாரித்து விற்பனை செய்ய உச்ச நீதிமன்றம் வழிவகுத்துள்ளது. இவை நிர்ணயிக்கப்பட்ட ஒலி, மாசு மற்றும் பாதுகாப்பு விதிமுறைகளைப் பின்பற்ற வேண்டும்.
அதேநேரத்தில், பேரியம் (Barium) பயன்படுத்தப்படும் பசுமைப் பட்டாசுகள் தொடர்பான இறுதி முடிவு இன்னும் எடுக்கப்படவில்லை. அவற்றின் சுற்றுச்சூழல் தாக்கத்தை அறிய டெல்லி, போபால், கொல்கத்தா மற்றும் சென்னை உள்ளிட்ட நகரங்களில் வெளிப்புற சோதனைகள் மேற்கொள்ளப்படுகின்றன. இதற்கான ஆய்வு முடிவுகளை சமர்ப்பிக்க அக்டோபர் 15 வரை அவகாசம் வழங்கப்பட்டுள்ளது.
இதையடுத்து, தீபாவளியின்போது எந்த வகை பட்டாசுகளை, எந்த நேரத்தில் வெடிக்கலாம் என்பது தொடர்பான கட்டுப்பாடுகள் அடுத்தகட்ட விசாரணைகளில் மேலும் தெளிவாகும் என எதிர்பார்க்கப்படுகிறது. டெல்லி–என்சிஆர் தொடர்பான விவகாரம் தனியாகவும் பரிசீலிக்கப்படுகிறது.
