தங்க ஆபரணங்களுடன் கம்பீர தோற்றம்; அனல் பறக்கும் பார்வையில் ரசிகர்களை கவரும் ராக்கிங் ஸ்டார்!
இந்திய சினிமா ரசிகர்கள் ஆவலுடன் எதிர்பார்த்து வரும் பிரம்மாண்ட திரைப்படமான ‘ராமாயணம்’ படத்தின் அடுத்த அப்டேட் வெளியாகி ரசிகர்களை உற்சாகப்படுத்தியுள்ளது. நிதேஷ் திவாரி இயக்கத்தில் உருவாகி வரும் இப்படத்தில் ராவணன் கதாபாத்திரத்தில் நடிக்கும் ராக்கிங் ஸ்டார் யஷின் முதல் அதிகாரப்பூர்வ போஸ்டரை படக்குழு
வெளியிட்டுள்ளது.
தங்கக் கிரீடம், முத்து மாலைகள், பிரம்மாண்ட தங்க ஆபரணங்கள் என ராஜ கம்பீரத்துடன் காட்சியளிக்கும் யஷ், தனது தீவிரமான பார்வையால் போஸ்டரில் ரசிகர்களின் கவனத்தை ஈர்க்கிறார். ராவணனின் கம்பீரத்தையும், அதிகாரத்தையும் பிரதிபலிக்கும் வகையில் அவரது தோற்றம் வடிவமைக்கப்பட்டுள்ளது.
படத்தின் டிரெய்லர் வெளியானது முதலே யஷ் ஏற்று நடித்துள்ள ராவணன் கதாபாத்திரம் ரசிகர்களிடையே மிகுந்த எதிர்பார்ப்பை ஏற்படுத்தி வருகிறது. தற்போது வெளியாகியுள்ள இந்த போஸ்டர், அந்த எதிர்பார்ப்பை மேலும் அதிகரித்துள்ளது.
வலிமை, அறிவு, அதிகாரம், கம்பீரம் என ராவணனின் பல்வேறு பரிமாணங்களை வெளிப்படுத்தும் வகையில் யஷின் கதாபாத்திரம் உருவாக்கப்பட்டுள்ளதாக தெரிகிறது. வெளியாகியுள்ள போஸ்டர், படத்தின் பிரம்மாண்டத்திற்கு ஒரு சிறிய முன்னோட்டமாக அமைந்துள்ளது.
இந்தப் படத்தில் ரன்பீர் கபூர் ஸ்ரீ ராமராகவும், சாய் பல்லவி சீதையாகவும், யஷ் ராவணனாகவும், சன்னி தியோல் அனுமனாகவும் நடித்துள்ளனர். பெரும் பொருட்செலவில் உருவாகி வரும் ‘ராமாயணம்’ திரைப்படம் இரண்டு பாகங்களாக வெளியாக உள்ளது. முதல் பாகம் தீபாவளி 2026-லும், 2-ம் பாகம் தீபாவளி 2027-லும் வெளியாகும் என அறிவிக்கப்பட்டுள்ளது.
