ஜப்பானில் நடைபெற்று வரும் பாரா ஆசிய விளையாட்டுப் போட்டிகளில் தங்கம் மற்றும் வெண்கலப் பதக்கங்களை வென்று இந்தியாவிற்கும் தமிழ்நாட்டிற்கும் பெருமை சேர்த்துள்ள தமிழக வீரர், வீராங்கனைகளுக்கு அதிமுக முன்னாள் அமைச்சரும், சட்டமன்ற உறுப்பினருமான எஸ்.பி. வேலுமணி பாராட்டுகளையும் வாழ்த்துகளையும் தெரிவித்துள்ளார்.
இதுகுறித்து அவர் தனது எக்ஸ் தளப் பதிவில் தெரிவித்திருப்பதாவது:
ஜப்பானில் நடைபெற்று வரும் பாரா ஆசிய விளையாட்டுப் போட்டிகளில், பேட்மிண்டன் பெண்கள் ஒற்றையர் SU5 பிரிவில் வெண்கலப் பதக்கம் வென்று சாதனை படைத்துள்ள தமிழக வீராங்கனை மனிஷா ராமதாஸ் அவர்களுக்கு எனது மனமார்ந்த பாராட்டுகளையும் வாழ்த்துகளையும் தெரிவித்துக்கொள்கிறேன். ஏற்கனவே கலப்பு இரட்டையர் பிரிவிலும் வெண்கலப் பதக்கம் வென்று பெருமை சேர்த்துள்ள அவர், தொடர்ந்து பல வெற்றிகளைக் குவித்து சாதனை படைக்க வாழ்த்துகிறேன்.
அதேபோல், தடகளப் போட்டியில் ஆண்கள் நீளம் தாண்டுதல் T64 பிரிவில் தங்கப் பதக்கம் வென்று இந்தியாவிற்கும் தமிழ்நாட்டிற்கும் பெருமை சேர்த்துள்ள தமிழக வீரர் சோலைராஜ் தர்மராஜ் அவர்களுக்கும் எனது பாராட்டுகளையும் வாழ்த்துகளையும் தெரிவித்துக்கொள்கிறேன். கடின உழைப்பு, விடாமுயற்சி மற்றும் அர்ப்பணிப்பு உணர்வால் இந்த மகத்தான வெற்றியைப் பெற்றுள்ள அவர், எதிர்காலத்திலும் பல சாதனைகளைப் படைக்க வாழ்த்துகிறேன்.
மேலும், பேட்மிண்டன் ஆண்கள் இரட்டையர் SL3-SU5 பிரிவில் இந்திய அணி சார்பில் பங்கேற்று வெண்கலப் பதக்கமும், ஆண்கள் ஒற்றையர் SL4 பிரிவில் தங்கப் பதக்கமும் வென்று சாதனை படைத்துள்ள தமிழக வீரர் நவீன் சிவக்குமார் அவர்களுக்கும் எனது மனமார்ந்த பாராட்டுகளையும் வாழ்த்துகளையும் தெரிவித்துக்கொள்கிறேன்.
தங்களது திறமை, கடின உழைப்பு மற்றும் விடாமுயற்சியால் சர்வதேச அரங்கில் பதக்கங்களை வென்று தமிழகத்திற்குப் பெருமை சேர்த்துள்ள இந்த மூன்று வீரர்களும், விளையாட்டுத் துறையில் சாதிக்கத் துடிக்கும் இளம் தலைமுறையினருக்கு சிறந்த முன்னுதாரணமாகத் திகழ்கின்றனர்.
இவர்கள் அனைவரும் வரும் காலங்களிலும் தொடர்ந்து பல்வேறு சர்வதேசப் போட்டிகளில் பங்கேற்று, மேலும் பல பதக்கங்களை வென்று இந்தியாவிற்கும் தமிழ்நாட்டிற்கும் பெருமை சேர்க்க வேண்டும் என மனதார வாழ்த்துகிறேன்.
இவ்வாறு எஸ்.பி. வேலுமணி தனது எக்ஸ் தளப் பதிவில் தெரிவித்துள்ளார்.
