சென்னை புழல் மத்திய சிறையில் பலத்த பாதுகாப்பையும் மீறி அடுத்தடுத்து இரண்டு கைதிகள் தப்பியோடிய சம்பவம் பெரும் பரபரப்பை ஏற்படுத்தியுள்ளது. தப்பியோடிய கைதிகளைப் பிடிக்க 14 தனிப்படைகள் அமைக்கப்பட்டு தீவிர தேடுதல் வேட்டை நடைபெற்று வருகிறது.
சென்னை புழல் மத்திய சிறையில் 3,500-க்கும் மேற்பட்ட கைதிகள் அடைக்கப்பட்டுள்ளனர். இந்நிலையில், நேபாளத்தைச் சேர்ந்த சுதீப் போகதி என்பவர், கடந்த ஆகஸ்ட் மாதம் திருட்டு வழக்கில் கைது செய்யப்பட்டு சிறையில் அடைக்கப்பட்டிருந்தார்.
அக்டோபர் 20ஆம் தேதி மாலை கைதிகளின் எண்ணிக்கையைச் சரிபார்த்தபோது சுதீப் மாயமானது தெரியவந்தது. இதையடுத்து சிறை வளாகம் முழுவதும் அதிகாரிகள் தேடியும் அவரைக் கண்டுபிடிக்க முடியவில்லை.
மற்றொரு கைதியும் தப்பியதால் பரபரப்பு!
இதற்கிடையே, போக்சோ வழக்கில் தண்டனை பெற்று சிறையில் அடைக்கப்பட்டிருந்த சென்னை திருமங்கலம் பகுதியைச் சேர்ந்த சுரேஷ் (41) என்பவரும் அக்டோபர் 21ஆம் தேதி தப்பியோடியுள்ளார்.
சிறையில் நன்னடத்தையுடன் இருந்ததால், சிறைக்கு வெளியே செயல்படும் அங்காடியில் பணியாற்ற சுரேஷுக்கு அனுமதி வழங்கப்பட்டிருந்தது. வழக்கம்போல் அங்காடிக்குச் சென்ற அவர், அங்கிருந்து தப்பியதாகக் கூறப்படுகிறது.
14 தனிப்படைகள் தீவிர தேடுதல்!
தப்பியோடிய இரு கைதிகளையும் பிடிக்க 14 தனிப்படைகள் அமைக்கப்பட்டுள்ளதாகத் தகவல் வெளியாகியுள்ளது. மேலும், சிறையில் பாதுகாப்புக் குறைபாடு ஏற்பட்டதா என்பது குறித்து சிறை வார்டன்கள் மற்றும் ஊழியர்களிடம் அதிகாரிகள் விசாரணை நடத்தி வருகின்றனர்.
பலத்த பாதுகாப்பு கொண்ட புழல் மத்திய சிறையில் இருந்து அடுத்தடுத்து இரண்டு கைதிகள் தப்பியோடியிருப்பது சிறைத்துறை மற்றும் காவல்துறை வட்டாரத்தில் பெரும் அதிர்ச்சியை ஏற்படுத்தியுள்ளது.
