சென்னை: நவம்பர் 2-ம் தேதி நீலகிரி மற்றும் திருவள்ளூர் மாவட்டங்களில் இடி, மின்னலுடன் கூடிய கனமழை பெய்யக்கூடும் என்று சென்னை வானிலை ஆய்வு மையம் தெரிவித்துள்ளது. மேலும், வங்கக்கடலில் உருவாகும் காற்றழுத்த தாழ்வு மண்டலம் புயலாக வலுப்பெற்று ஆந்திர கடலோரப் பகுதிகளை நோக்கி நகரக்கூடும் என்றும் எச்சரிக்கை விடுக்கப்பட்டுள்ளது.
இதுதொடர்பாக சென்னை வானிலை ஆய்வு மையம் வெளியிட்டுள்ள செய்திக்குறிப்பில் கூறப்பட்டுள்ளதாவது:
வங்கக்கடலில் புயல் உருவாக வாய்ப்பு
தெற்கு அந்தமான் கடல் பகுதிகள் மற்றும் அதனை ஒட்டிய அந்தமான் நிகோபார் தீவுகளில் நேற்று (அக். 30) நிலவிய காற்றழுத்த தாழ்வு பகுதி, மேற்கு-வடமேற்கு திசையில் நகர்ந்து இன்று (அக். 31) காலை 5.30 மணியளவில் தென்கிழக்கு வங்கக்கடல் மற்றும் அதனை ஒட்டிய அந்தமான் நிகோபார் தீவுகள், அந்தமான் கடல் பகுதிகளில் ஆழ்ந்த காற்றழுத்த தாழ்வு பகுதியாக வலுப்பெற்றது.
இது காலை 8.30 மணியளவில் அதே பகுதிகளில் நிலவியது. தொடர்ந்து மேற்கு-வடமேற்கு திசையில் நகர்ந்து அடுத்த 6 மணி நேரத்தில் காற்றழுத்த தாழ்வு மண்டலமாகவும், அதன்பிறகு 24 மணி நேரத்தில் புயலாகவும் வலுப்பெறக்கூடும்.
இந்த புயல் மேலும் மேற்கு-வடமேற்கு திசையில் நகர்ந்து, நவம்பர் 2-ம் தேதி மாலை மத்தியமேற்கு வங்கக்கடல் பகுதியில் ஆந்திரப் பிரதேச கடலோரப் பகுதிகளுக்கு அருகில் நகரக்கூடும்.
வளிமண்டல சுழற்சி
சுமார் 1.5 கி.மீ. உயரத்தில் கேரளா-கர்நாடக கடலோரப் பகுதிகளுக்கு அப்பால் உள்ள தென்கிழக்கு அரபிக்கடல் பகுதிகளில் இருந்து தெற்கு மகாராஷ்டிரா கடலோரப் பகுதிகள் மற்றும் அதனை ஒட்டிய பகுதிகளில் நிலவும் வளிமண்டல சுழற்சி வரை காற்றழுத்த தாழ்வு பாதை நிலவுகிறது.
தமிழகத்தில் மழை முன்னறிவிப்பு
அக்டோபர் 31: மேற்கு தொடர்ச்சி மலை மாவட்டங்கள் மற்றும் கடலோர தமிழகத்தில் ஓரிரு இடங்களில் லேசான மழை பெய்யக்கூடும். புதுவை, காரைக்கால் பகுதிகளிலும் மழைக்கு வாய்ப்புள்ளது. ஏனைய தமிழகத்தில் பொதுவாக வறண்ட வானிலை நிலவக்கூடும்.
நவம்பர் 1: வடக்கு கடலோர தமிழக மாவட்டங்கள், மேற்கு தொடர்ச்சி மலை மாவட்டங்கள், மதுரை, திருச்சி, நாமக்கல், சேலம், ஈரோடு, கரூர் ஆகிய மாவட்டங்களில் ஓரிரு இடங்களில் இடி, மின்னலுடன் கூடிய லேசானது முதல் மிதமான மழை பெய்யக்கூடும். புதுவை, காரைக்கால் பகுதிகளிலும் மழைக்கு வாய்ப்புள்ளது.
நவம்பர் 2: நீலகிரி மற்றும் திருவள்ளூர் மாவட்டங்களில் ஓரிரு இடங்களில் இடி, மின்னலுடன் கூடிய கனமழை பெய்யக்கூடும். ஏனைய தமிழகத்தின் சில இடங்களிலும், புதுவை, காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும்.
நவம்பர் 3: கடலூர், விழுப்புரம் மாவட்டங்கள் மற்றும் புதுவையில் ஓரிரு இடங்களில் இடி, மின்னலுடன் கூடிய கனமழை பெய்யக்கூடும். மேற்கு தொடர்ச்சி மலை மாவட்டங்கள், வட தமிழகத்தின் சில இடங்கள், காரைக்கால் பகுதிகளில் மிதமான மழை பெய்யக்கூடும்.
நவம்பர் 4: தமிழகத்தின் சில இடங்களிலும், புதுவை, காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும்.
நவம்பர் 5, 6: தமிழகத்தின் சில இடங்களிலும், புதுவை, காரைக்கால் பகுதிகளிலும் லேசானது முதல் மிதமான மழை பெய்யக்கூடும்.
சென்னையின் வானிலை
இன்று (அக். 31) சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும். பொதுவாக வறண்ட வானிலை நிலவக்கூடும். அதிகபட்ச வெப்பநிலை 34 முதல் 35 டிகிரி செல்சியஸ் வரையிலும், குறைந்தபட்ச வெப்பநிலை 25 முதல் 26 டிகிரி செல்சியஸ் வரையிலும் இருக்கக்கூடும்.
நாளை (நவ. 1) நகரின் சில பகுதிகளில் இடி, மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை 33 முதல் 34 டிகிரி செல்சியஸ் வரையிலும், குறைந்தபட்ச வெப்பநிலை 25 முதல் 26 டிகிரி செல்சியஸ் வரையிலும் இருக்கக்கூடும்.
மீனவர்களுக்கு எச்சரிக்கை
நவம்பர் 1 முதல் 3-ம் தேதி வரை வட தமிழக கடலோரப் பகுதிகளில் மணிக்கு 40 முதல் 50 கி.மீ. வேகத்திலும், இடையிடையே 60 கி.மீ. வேகத்திலும் சூறாவளிக்காற்று வீசக்கூடும்.
வங்கக்கடல் பகுதிகளில் அக்டோபர் 31 முதல் நவம்பர் 4-ம் தேதி வரை பல்வேறு பகுதிகளில் மணிக்கு 40 முதல் 90 கி.மீ. வேகத்திலும், இடையிடையே 100 கி.மீ. வேகத்திலும் சூறாவளிக்காற்று வீசக்கூடும் என எச்சரிக்கப்பட்டுள்ளது.
குறிப்பாக நவம்பர் 1, 2-ம் தேதிகளில் ஆந்திர கடலோரப் பகுதிகள் மற்றும் மத்தியமேற்கு வங்கக்கடல் பகுதிகளில் பலத்த காற்று வீசக்கூடும்.
எனவே, மேற்கண்ட நாட்களில் மீனவர்கள் வங்கக்கடல் பகுதிகளுக்குச் செல்ல வேண்டாம் என அறிவுறுத்தப்பட்டுள்ளனர். அரபிக்கடல் பகுதிகளில் எச்சரிக்கை ஏதுமில்லை.
