தமிழகத்தில் ஆவின் பால் உபபொருட்களின் விலை உயர்த்தப்படுவதாகத் தகவல் வெளியாகியுள்ளது. இந்த விலை உயர்வு அக்டோபர் 28ஆம் தேதி முதல் அமலுக்கு வருவதாகக் கூறப்படுகிறது. இதனால் நெய், தயிர், மைசூர்பாக், மில்க் ஷேக் உள்ளிட்ட ஆவின் பொருட்களை வாங்கும் பொதுமக்கள் கூடுதல் தொகை செலுத்த வேண்டிய நிலை ஏற்பட்டுள்ளது.
நெய் உள்ளிட்ட சில பொருட்களின் விலை உயர்த்தப்பட்டுள்ளதாக வெளியாகியுள்ள தகவலின்படி, ஒரு லிட்டர் நெய்யின் விலை ரூ.700-லிருந்து ரூ.780 ஆகவும், 500 மில்லி நெய்யின் விலை ரூ.365-லிருந்து ரூ.400 ஆகவும் உயர்த்தப்படுவதாகக் கூறப்படுகிறது.
அதேபோல், 500 கிராம் தயிரின் விலை ரூ.35-லிருந்து ரூ.40 ஆகவும், 250 கிராம் மைசூர்பாகின் விலை ரூ.140-லிருந்து ரூ.160 ஆகவும் உயர்த்தப்படுவதாகத் தகவல்கள் தெரிவிக்கின்றன. மில்க் ஷேக் விலை ரூ.30-லிருந்து ரூ.35 ஆகவும், 200 மில்லி மோரின் விலை ரூ.8-லிருந்து ரூ.10 ஆகவும் அதிகரிக்கப்படுவதாகக் கூறப்படுகிறது.
ஏற்கெனவே அத்தியாவசியப் பொருட்களின் விலை உயர்வால் சிரமங்களைச் சந்தித்து வரும் பொதுமக்களுக்கு, ஆவின் பொருட்களின் விலை உயர்வு கூடுதல் சுமையை ஏற்படுத்தும் என எதிர்பார்க்கப்படுகிறது.
