ஜார்க்கண்ட் மாநிலத்தில் சிறைச் சீர்திருத்தத்தின் ஒரு பகுதியாக, நன்னடத்தை கொண்ட தேர்ந்தெடுக்கப்பட்ட கைதிகள் பகல் நேரத்தில் சிறைக்கு வெளியே சென்று வேலை செய்ய அனுமதிக்கும் புதிய திட்டம் அறிமுகப்படுத்தப்பட உள்ளது. வேலை முடிந்ததும் அவர்கள் மாலையில் மீண்டும் சிறைக்கு திரும்ப வேண்டும்.
இந்தத் திட்டத்தின் கீழ், தகுதியான கைதிகள் காலை 6 அல்லது 7 மணியளவில் சிறையிலிருந்து வெளியே சென்று வேலை செய்யலாம். சுமார் 12 மணி நேரத்திற்குள் மீண்டும் சிறைக்கு திரும்ப வேண்டும். இதன் மூலம் கைதிகள் வருமானம் ஈட்டி, குடும்பத்தினருக்கு பொருளாதார உதவி வழங்குவதுடன், விடுதலைக்குப் பிறகு சமூகத்தில் மீண்டும் இணையவும் வாய்ப்பு ஏற்படும்.
இந்த வசதி அனைத்து கைதிகளுக்கும் வழங்கப்படாது. நன்னடத்தை மற்றும் சிறைக்குள் விதிகளை முறையாகப் பின்பற்றும் கைதிகள் மட்டுமே தேர்வு செய்யப்பட உள்ளனர். இதற்கான தகுதி விதிமுறைகள் மற்றும் செயல்பாட்டு நடைமுறைகள் தனியாக வகுக்கப்பட உள்ளன.
ராஞ்சி, ஹசாரிபாக், கிழக்கு சிங்பூம் மற்றும் தும்கா ஆகிய இடங்களில் உள்ள 4 மத்திய சிறைகளில் திறந்த மற்றும் அரைத் திறந்த சிறை வளாகங்கள் மூலம் இத்திட்டத்தை செயல்படுத்துவதற்கான ஏற்பாடுகள் நடைபெற்று வருகின்றன.
கைதிகளுக்கு வேலைவாய்ப்பு, சுயசார்பு மற்றும் மறுவாழ்வுக்கான வாய்ப்பை உருவாக்குவதே இந்தத் திட்டத்தின் முக்கிய நோக்கமாகும்.
