80-களின் பின்னணியில் ஆக்ஷன், நகைச்சுவை, குடும்ப உணர்வுகளுடன் உருவாகியுள்ள ‘பத்தா’ திரைப்படத்தின் டிரெய்லர் வெளியாகியுள்ளது.
மக்கள் செல்வன் விஜய் சேதுபதி நடிப்பில், பாலாஜி தரணிதரன் இயக்கத்தில் உருவாகியுள்ள ‘பத்தா’ திரைப்படத்தின் டிரெய்லர் ரசிகர்களின் கவனத்தை ஈர்த்துள்ளது. இயக்குநர் அட்லி வழங்கும் இப்படத்தை ஸ்டார் ஸ்டுடியோ18, ஏ ஃபார் ஆப்பிள் ஸ்டுடியோஸ் மற்றும் சினி 1 ஸ்டுடியோஸ் இணைந்து தயாரித்துள்ளன.
இரண்டு சிறுவர்கள் ரௌடி ‘பத்தா’வின் வீரத்தைப் பற்றி பேசுவதுடன் தொடங்கும் டிரெய்லர், அவர் யாராலும் அசைக்க முடியாதவர் என்ற பிம்பத்தை உருவாக்குகிறது. தொடர்ந்து வரும் ஆக்ஷன் காட்சிகள், பத்தாவின் பல்வேறு முகங்களை அறிமுகப்படுத்துவதுடன், எதிர்பாராதவிதமாக அவருக்குள் இருக்கும் குடும்பஸ்தனையும் காட்டி ஆச்சரியப்படுத்துகின்றன.
ஆக்ஷன் களமாக நகரும் டிரெய்லர், அடுத்தடுத்து நகைச்சுவை காட்சிகளுடன் வேறு கோணத்திற்கும் செல்கிறது. பத்தாவின் வாழ்க்கை, அவரைச் சுற்றியுள்ள மனிதர்கள் மற்றும் உறவுகள் என பல்வேறு அம்சங்கள் சுவாரஸ்யமாக காட்சிப்
படுத்தப்பட்டுள்ளன.
டிரெய்லரின் இறுதியில் இடம்பெறும் ‘செல்லமே மகளே’ பாடல் காட்சிகள் படத்தின் உணர்வுப்பூர்வமான பக்கத்தை வெளிப்படுத்துகின்றன. “அப்பா வந்திருவார்ல அம்மா?” என சிறுமி கேட்கும் நிலையில், சிறையில் இருக்கும் பத்தாவின் காட்சியுடன் டிரெய்லர் முடிவடைகிறது. இதனால், பத்தா ஏன் சிறைக்குச் சென்றார்? அவரது வாழ்க்கையில் என்ன நடந்தது? என்ற கேள்விகள் எழுகின்றன.
80-களின் காலகட்டத்தை பிரதிபலிக்கும் வகையில் உருவாக்கப்பட்டுள்ள இப்படத்தில், அந்த காலத்தின் தோற்றம், உடைகள், காட்சியமைப்பு என அனைத்தும் கதையின் பின்னணியை அழுத்தமாக உணர்த்துகின்றன.
விஜய் சேதுபதியுடன் ‘ஜெய் பீம்’ புகழ் லிஜோமோல் ஜோஸ் கதாநாயகியாக நடித்துள்ளார். ஹரிகிருஷ்ணன், சாந்தி பாலச்சந்திரன், அர்ஜுன் சிதம்பரம், அஜய் கோஷ், தீபா வெங்கட் உள்ளிட்ட பலர் முக்கிய கதாபாத்திரங்களில் நடித்துள்ளனர்.
சாய் அப்யங்கர் இசையமைக்க, செல்வகுமார் எஸ்.கே. ஒளிப்பதிவு செய்துள்ளார். ஆர். கலைவாணன் படத்தொகுப்பையும், டி. முத்துராஜ் தயாரிப்பு வடிவமைப்பையும் கவனித்துள்ளனர்.
ஆக்ஷன், நகைச்சுவை, குடும்ப உணர்வு மற்றும் மர்மம் என பல அம்சங்களை இணைத்துள்ள ‘பத்தா’ திரைப்படம் அக்டோபர் 1-ம் தேதி உலகம் முழுவதும் திரையரங்குகளில் வெளியாகிறது.
