மலைகளால் சூழப்பட்ட ‘மேக்கரை’ கிராமம். அங்கு தலைமுறை தலைமுறையாக பேசப்படும் காட்டுத் தெய்வத்தின் சாபம். அதைச் சுற்றி நிகழும் மர்ம மரணங்கள். எதிர்காலத்தில் நடக்கப்போகும் சம்பவங்களை முன்கூட்டியே பதிவு செய்து வைத்திருக்கும் விசித்திரமான புத்தகம். இவை அனைத்தும் ஒன்றாக இணையும் போது உருவாகிறது ‘தி டார்க் ஹெவன்’.
மேக்கரை கிராமத்தின் நூலகர் ஒருவர் கலை மற்றும் கைவினைப் பொருட்கள் விற்பனை செய்யும் கடையில் ஒரு மர்மமான புத்தகத்தைக் கண்டெடுக்கிறார். அந்தப் புத்தகத்தைப் படிக்கத் தொடங்கியதும், அதில் எழுதப்பட்டிருப்பவை வெறும் கதைகள் அல்ல என்பது தெரிய வருகிறது. இனி நடக்கப்போகும் சம்பவங்கள், குறிப்பாக ஒருவரின் மரணம், அது எப்போது நிகழும், யாரால் நிகழும் என்பது வரை அதில் முன்கூட்டியே எழுதப்பட்டிருக்கிறது.
25 ஆண்டுகளுக்குப் பிறகு, நூலகராக பணிபுரிந்த திடீரென்று காணாமல் போன தனது தந்தைக்கு என்ன நடந்தது என்பதை அறிந்து கொள்ள அவரது மகள் மேக்கரைக்கு வருகிறார். அதே நேரத்தில், காட்டுத் தெய்வத்தின் சாபத்துடன் தொடர்புடையதாகக் கருதப்படும் தொடர் மரணங்களை விசாரிக்க காவல் அதிகாரி சித்து அந்த மலைக்கிராமத்திற்கு வருகிறார்.
சித்து பொறுப்பேற்ற நாளிலிருந்தே அடுத்தடுத்து கொலைகள் நடக்கத் தொடங்குகின்றன. விசாரணை தீவிரமடைய, ஒரு மனநலம் பிறழ்ந்த கொலையாளி மீது சந்தேகம் திரும்புகிறது. ஆனால், உண்மையான கொலையாளி யார்? மேக்கரையில் 25 ஆண்டுகளுக்கு முன்பு நடந்தது என்ன? அந்த மர்மப் புத்தகத்தின் பின்னணி என்ன? காட்டுத் தெய்வத்தின் சாபம் உண்மையா? என்ற கேள்விகளுடன் கதை பரபரப்பாக நகர்கிறது.
முதல் பாதி – மர்மமும் பதற்றமும்!
இயக்குநர் பாலாஜியின் தெளிவான கதை சொல்லல் மற்றும் மிரட்டலான திரைக்கதை படத்தின் முதல் பாதிக்கு வலுசேர்க்கிறது. கதை மெதுவாக நகர்ந்தாலும், ஒவ்வொரு காட்சியிலும் அடுத்து என்ன நடக்கும் என்ற எதிர்பார்ப்பை உருவாக்குவதில் இயக்குனர் வெற்றி பெற்றிருக்கிறார். மலைக்கிராமத்தின் தனிமையான சூழலும், தொடர்ந்து நிகழும் மர்ம சம்பவங்களும் படத்திற்கு கூடுதல் பதற்றத்தை ஏற்படுத்துகின்றன.
சின்னத்திரையிலிருந்து வெள்ளித்திரைக்கு அறிமுகமாகும் சித்து, காவல் அதிகாரி கதாபாத்திரத்திற்கு இயல்பான நடிப்பால் நியாயம் செய்திருக்கிறார். தர்ஷிகா, ரித்விகா ஆகியோர் தங்களுக்கு வழங்கப்பட்ட கதாபாத்திரங்களில் அளவான நடிப்பை வழங்கியுள்ளனர். நிழல்கள் ரவி, வேலா ராமமூர்த்தி, அருள் டி. சங்கர் ஆகியோரின் கதாபாத்திரங்கள் பார்வையாளர்களின் சந்தேகத்தை தொடர்ந்து அவர்கள் பக்கம் திருப்பும் வகையில் அமைக்கப்பட்டுள்ளன.
தொழில்நுட்பத்தில் மிரட்டல்!
மணிகண்டன் பி.கே.வின் ஒளிப்பதிவு படத்தின் மலைப்பகுதி காட்சிகளுக்கு மர்மமான மற்றும் மிரட்டலான தோற்றத்தை வழங்குகிறது. இருள் சூழ்ந்த மலைப்பாதைகள், கிராமத்தின் தனிமை, கொலை நடைபெறும் இடங்கள் என ஒவ்வொரு காட்சியிலும் பதற்றத்தை உணர முடிகிறது.
ராஜா ஆறுமுகத்தின் படத்தொகுப்பு இன்னும் சற்று வேகமாக இருந்திருக்கலாம். இருப்பினும், படத்தின் பல காட்சிகளை விறுவிறுப்பாக மாற்றுவதில் பின்னணி இசை முக்கிய பங்கு வகிக்கிறது. குறிப்பாக மர்மம் வெளிப்படும் தருணங்களில் இசை பதற்றத்தை அதிகரிக்கிறது.
குற்றப் பின்னணியிலான திரில்லர் படத்துக்குத் தேவையான பல அம்சங்கள் இருந்தாலும், மர்மப் புத்தகம், நூலகர், காட்டுத் தெய்வத்தின் சாபம், தொடர் கொலைகள், மனநலம் பிறழ்ந்த கொலையாளி என பல கதை இழைகள் ஒரே நேரத்தில் பயணிப்பது சில இடங்களில் குழப்பத்தை ஏற்படுத்துகிறது.
சில முடிச்சுகள் இரண்டாம் பாகத்துக்காக திட்டமிட்டு விடப்பட்டிருப்பது தெரிகிறது. முதல் பாகம் ஒரு முக்கியமான கதைக்கருவை மட்டும் மையப்படுத்தியிருந்தால், பார்வையாளர்களின் ஈடுபாடு இன்னும் அதிகரித்திருக்கும்.
கிளைமாக்ஸ் – யார் கொலையாளி?
படத்தின் மிகப்பெரிய பலம், இறுதிவரை கொலையாளி யார் என்பதை எளிதில் கணிக்க முடியாத வகையில் திரைக்கதை அமைக்கப்பட்டிருப்பதுதான். பார்வையாளர்களை தொடர்ந்து வேறு ஒரு நபர் மீது சந்தேகம் கொள்ளச் செய்வதும், இறுதிக்கட்டத்தில் அந்த சந்தேகத்தை மாற்றுவதும் சுவாரசியத்தை ஏற்படுத்துகிறது.
சில குறைகள் இருந்தாலும், மர்மம், பதற்றம், தொடர் கொலைகள், கணிக்க முடியாத திருப்பங்கள் என ஒரு கிரைம் த்ரில்லருக்கான சுவாரசிய அம்சங்களை கொண்டிருக்கிறது ‘தி டார்க் ஹெவன்’. எதிர்பாராத திருப்பங்களுடன் ரசிகர்களை இறுதி வரைக்கும் சீட்டின் நுனியில் அமர்ந்திருக்கும் வகையில் அமைந்துள்ளன.
மொத்தத்தில் – மர்மத்தை விரும்பும் ரசிகர்களுக்கு ‘தி டார்க் ஹெவன்’ ஒரு சுவாரசியமான திரில்லர் அனுபவம்.
