கொடைக்கானலில் அரங்கேறும் அடுத்தடுத்த கொலைகள்…மர்மத்தை துலக்கும் ‘நாற்கவி’!

‘நாற்கவி’ படத்துக்காக கானா பாலா எழுதி பாடிய அதிரடி பாடல்!

முழுக்க முழுக்க குற்றவியல் பின்னணியை மையமாக வைத்து உருவாகும் புதிய திரைப்படம் ‘நாற்கவி’. கொடைக்கானலை கதைக்களமாகக் கொண்டு உருவாகும் இப்படத்தின் படப்பிடிப்பு விரைவில் தொடங்க உள்ளது.

கொடைக்கானலில் அடுத்தடுத்து கொலைகள் நடைபெறுகின்றன. இதுகுறித்த போலீஸ் விசாரணையில், அங்குள்ள ஒரு லாட்ஜில் வேலை செய்யும் உதவியாளர் ஒருவர் சிக்குகிறார். அவரிடம் தொடர்ந்து விசாரணை நடத்தும்போது, அந்த லாட்ஜில் தங்கியுள்ள சில வெளிநாட்டினருக்கும் இந்த கொலைகளுக்கும் தொடர்பு இருப்பது தெரிய வருகிறது.
ஆனால், விசாரணையில் அவர்கள் முன்னுக்குப் பின் முரணாக பதிலளிக்கின்றனர். இதனால் கொலைகளின் பின்னணியில் இருப்பவர்கள் யார்? இதில் வெளிநாட்டினரின் பங்கு என்ன? என்ற கேள்விகள் எழுகின்றன. இறுதியில் இந்த கொலைகளில் தொடர்புடையவர்கள் யார் என்பது தெரியவரும் வகையில், திடுக்கிடும் சம்பவங்களுடன் ‘நாற்கவி’ உருவாகிறது.

இப்படத்திற்காக கானா பாலா எழுதி பாடியுள்ள பாடல் ஏற்கனவே பதிவு செய்யப்பட்டுள்ளது. “எவன்டா அவன்டா அவன்டா… நல்லவன் யாரும் இல்ல…” என தொடங்கும் இந்த பாடல், படத்தின் கதைக்களத்திற்கு ஏற்ற வகையில் அமைந்துள்ளதாக படக்குழு தெரிவித்துள்ளது.
கே.வி. மீடியா தயாரிக்கும் இப்படத்தை, ‘அங்காடித்தெரு’ மகேஷ் நடித்த ‘கருப்பு ஆடு’ படத்தை இயக்கிய விஜய் மோகன் இயக்குகிறார். இவர் கதை, திரைக்கதை மற்றும் வசனத்தையும் எழுதியுள்ளார்.

‘சந்தனக்காசு’ குறும்படத்தை இயக்கி வரவேற்பைப் பெற்ற சதீஷூடன், பிரகதீஸ்வரன், திண்டுக்கல் தனம், நெப்பு சாமி, தலக்காவூர் கார்த்தி, ‘மைனா’ வெங்கையா பாலன் உள்ளிட்டோர் முக்கிய கதாபாத்திரங்களில் நடிக்கின்றனர்.
படத்திற்கு எம்.கே.எஸ்., மாத்தூர் கணேசன், சாமி ஆகியோர் ஒளிப்பதிவு செய்கின்றனர். பி.வி. குமார் இசையமைக்கிறார். பாடல்களை கானா பாலா மற்றும் கவியரசன் எழுதுகின்றனர். நடனத்தை ஜாய்மதி கவனிக்கிறார். மக்கள் தொடர்புப் பணிகளை வெங்கட் மேற்கொள்கிறார்.

இணைத் தயாரிப்பாளர்களாக பாலசுப்பிரமணியம், ஏ. வசந்த், செல்வம், முருகேசன் ஆகியோர் உள்ளனர். கே.வி. மீடியா தயாரிக்கும் ‘நாற்கவி’ படத்தின் படப்பிடிப்பு விரைவில் தொடங்குகிறது.