புதுடெல்லி: போலி ஆவணங்கள் அல்லது தவறான அடையாள விவரங்களைப் பயன்படுத்தி சிம் கார்டு பெறுவது, தொலைத்தொடர்பு அடையாள எண்களை சட்டவிரோதமாக மாற்றுவது போன்ற செயல்களில் ஈடுபட்டால் 3 ஆண்டுகள் வரை சிறைத் தண்டனை அல்லது ரூ.50 லட்சம் வரை அபராதம் அல்லது இரண்டும் விதிக்கப்படலாம் என்று மத்திய தொலைத்தொடர்புத் துறை எச்சரித்துள்ளது.
தொலைத்தொடர்பு சட்டம், 2023-ன் கீழ், மோசடி அல்லது ஏமாற்றும் நோக்கத்துடன் சிம் உள்ளிட்ட தொலைத்தொடர்பு சேவைகளைப் பெறுவதற்கு போலியான ஆவணங்கள் அல்லது தவறான தகவல்களைப் பயன்படுத்துவது குற்றமாகும். இத்தகைய குற்றங்களுக்கு 3 ஆண்டுகள் வரை சிறை, ரூ.50 லட்சம் வரை அபராதம் அல்லது இரண்டும் விதிக்க சட்டத்தில் வழிவகை செய்யப்பட்டுள்ளது.
அதேபோல், செல்போன்களை அடையாளம் காணப் பயன்படும் IMEI (International Mobile Equipment Identity) எண்ணை அனுமதியின்றி மாற்றுவது, அழிப்பது அல்லது முறைகேடாக கையாள்வதும் சட்ட நடவடிக்கைக்கு வழிவகுக்கும். திருடப்பட்ட அல்லது சட்டவிரோதமாகப் பயன்படுத்தப்படும் செல்போன்களை மறைப்பதற்காக IMEI எண்களை மாற்றுவது உள்ளிட்ட மோசடிகளைக் கட்டுப்படுத்த நடவடிக்கைகள் தீவிரப்படுத்தப்பட்டுள்ளன.
பொதுமக்கள் தங்களது பெயரில் தெரியாமல் வேறு மொபைல் இணைப்புகள் செயல்படுகிறதா என்பதை மத்திய அரசின் Sanchar Saathi சேவை மூலம் சரிபார்க்கலாம். சந்தேகத்திற்குரிய இணைப்புகளைப் புகாரளிக்கவும், தொலைந்த அல்லது திருடப்பட்ட செல்போன்களை முடக்குவதற்கான கோரிக்கையை அளிக்கவும் இந்த சேவையைப் பயன்படுத்தலாம்.
எனவே சிம் கார்டு வாங்கும்போது உண்மையான அடையாள ஆவணங்களை மட்டுமே பயன்படுத்த வேண்டும் என்றும், தங்களது அடையாள ஆவணங்கள் மற்றும் OTP உள்ளிட்ட தகவல்களை மற்றவர்களிடம் பகிர்வதைத் தவிர்க்க வேண்டும் என்றும் பொதுமக்களுக்கு அறிவுறுத்தப்பட்டுள்ளது.
