செல்போனில் நொடிப்பொழுதில் தகவல் அனுப்பி, ஒரே தொடுதலில் அன்புக்குரியவர்களின் குரலைக் கேட்கும் இன்றைய காலத்துக்கு மாறாக, ஒரு காலத்தில் காதல் என்பது கடிதங்களிலும் ஆடியோ கேசட்டுகளிலும், நீண்ட நேர காத்திருப்பிலும் வாழ்ந்தது. அந்தக் காலகட்டத்தின் காதலையும் குடும்ப உறவுகளையும் பதிவு செய்யும் வகையில் உருவாகியுள்ள தமிழ் பீரியட் ரொமான்டிக் திரைப்படம் ‘ஹபீபி’, செப்டம்பர் 25 முதல் Sony LIV தளத்தில் வெளியாகிறது.
மீரா கதிரவன் இயக்கியுள்ள இப்படத்தின் கதை திருநெல்வேலி அருகே உள்ள ஒரு நகரத்தை பின்னணியாகக் கொண்டு நான்கு தசாப்த காலத்தை கடந்து பயணிக்கிறது. குடும்பம், பாரம்பரியம், மாறிவரும் வாழ்க்கை முறை மற்றும் காதல் ஆகியவற்றை மையமாகக் கொண்டு கதை உருவாகியுள்ளது.
கஸ்தூரி ராஜா நடிக்கும் முகமது யூசுப், தொழில் நலிவடைந்து வரும் சூழலிலும் தனது பரம்பரை கைத்தறித் தொழிலை காப்பாற்ற போராடுகிறார். அவரது மகன் அபுதாஹிர் கதாபாத்திரத்தில் ஈஷா எம் நடிக்கிறார். குடும்ப பாரம்பரியத்தை காப்பாற்ற வேண்டிய பொறுப்புக்கும், நிலோஃபர் மீதான ஆழமான காதலுக்கும் இடையில் சிக்கித் தவிக்கும் இளைஞராக அவர் நடித்துள்ளார். நிலோஃபர் கதாபாத்திரத்தில் மாளவிகா மனோஜ் நடித்துள்ளார்.
வளைகுடா நாடுகளுக்கான இடம்பெயர்வு பின்னணியில், குடும்பங்கள் கடிதங்கள், கேசட் பதிவுகள் மற்றும் நீண்ட காத்திருப்புகளின் மூலம் உறவுகளை பேணிய காலத்தை இப்படம் பதிவு செய்கிறது. மறைந்து வரும் கைத்தறித் தொழில், மாறிவரும் பாரம்பரியங்கள் மற்றும் தூரத்தால் வலுப்பெறும் காதல் ஆகியவை படத்தின் முக்கிய அம்சங்களாக அமைந்துள்ளன.
வி.எஸ். முகமது அமீன் எழுதியுள்ள இப்படத்திற்கு மகேஷ் முத்துசாமி ஒளிப்பதிவு செய்துள்ளார். சாம் சி.எஸ். இசையமைத்துள்ளார். தனஸ்ரீ சுதாகரன், அருள்குமார், அனுஸ்ரேயா ராஜன் உள்ளிட்டோரும் முக்கிய கதாபாத்திரங்களில் நடித்துள்ளனர்.
‘ஹபீபி’ திரைப்படம் செப்டம்பர் 25, 2026 முதல் Sony LIV-ல் பிரத்யேகமாக வெளியாகிறது.
