தமிழகத்தில் டாஸ்மாக் பார் டெண்டர் ஒரு மாதத்தில் வெளியிடப்படும் என்றும், புதிய டெண்டரில் பார்களுடன் உணவகங்களையும் நடத்திக்கொள்ளும் வகையில் விதிமுறைகள் கொண்டுவரப்பட உள்ளதாகவும் மதுவிலக்குத் துறை அமைச்சர் விக்னேஷ் தெரிவித்துள்ளார்.
கோவை மாவட்ட நிர்வாகம் மற்றும் மாவட்ட முன்னோடி வங்கி சார்பில் பீளமேடு பகுதியில் உள்ள தனியார் கல்லூரியில் கல்விக் கடன் முகாம் நடைபெற்றது. இதில் பங்கேற்ற அமைச்சர் விக்னேஷ், மாணவர்களுக்கு கல்விக் கடன்களை வழங்கினார்.
பின்னர் செய்தியாளர்களிடம் பேசிய அவர், டாஸ்மாக் துறையில் பல்வேறு மாற்றங்கள் கொண்டு வரப்படும் என தெரிவித்தார். மதுபான நிறுவனங்களிடம் இருந்து கொள்முதல் செய்வது தொடர்பாக 11 நிறுவனங்களுக்கும் சமமான அளவில் ஆர்டர்கள் வழங்கப்படுவதாகவும், பழிவாங்கும் நோக்கத்துடன் அரசு செயல்படவில்லை என்றும் கூறினார்.
டாஸ்மாக் துறையை வருவாய் ஈட்டும் நோக்கில் மட்டும் பார்க்காமல், முறையான நிர்வாகத்தை கொண்டு வர நடவடிக்கை எடுக்கப்படும் என்றும், போதையில்லாத தமிழகத்தை உருவாக்குவதே அரசின் இலக்கு என்றும் அமைச்சர் தெரிவித்தார்.
மேலும், கோவையில் விதிமுறைகளை மீறிய FL2 பார்கள் மீது நடவடிக்கை எடுக்கப்பட்டுள்ளதாகவும், அரசு மதுபானக் கடைகளை முறைப்படுத்திய பின்னர் FL2 பார்கள் மீதும் கவனம் செலுத்தப்படும் என்றும் கூறினார்.
டாஸ்மாக் பார்களில் தரமற்ற உணவுகள் விற்பனை செய்யப்படுவது தொடர்பாக பேசிய அமைச்சர், புதிய பார் டெண்டரில் உணவகங்களையும் நடத்திக்கொள்ளும் வகையில் விதிமுறைகள் கொண்டு வரப்பட உள்ளதாக தெரிவித்தார். இதன் மூலம் உணவுப் பாதுகாப்புத் துறை அதிகாரிகள் நேரடியாக ஆய்வு மேற்கொண்டு, தரமற்ற உணவுப் பொருட்கள் விற்பனை செய்யப்பட்டால் நடவடிக்கை எடுக்க முடியும் என்றும் அமைச்சர் விளக்கம் அளித்தார்.
