திருவள்ளூர் மாவட்டம், திருமழிசை மின் மயானத்தில் ஏற்பட்ட மின்தடையால் இறுதிச் சடங்கு தாமதமான சம்பவத்தைச் சுட்டிக்காட்டி, அமமுக பொதுச்செயலாளர் டிடிவி தினகரன் அரசைக் கடுமையாக விமர்சித்துள்ளார்.
திருமழிசை மின் மயானத்தில் மின்தடை ஏற்பட்டதால், தனது தந்தையின் உடலைத் தகனம் செய்ய முடியாமல் தவித்த மகன், நீண்ட நேரக் காத்திருப்புக்குப் பிறகு சொந்தச் செலவில் ஜெனரேட்டரை வாடகைக்கு எடுத்து வந்து தகனம் செய்ததாகக் கூறப்படுகிறது. மின்தடை குறித்து புகார் அளித்தும் உரிய நடவடிக்கை எடுக்கப்படவில்லை எனவும் செய்திகள் தெரிவிக்கின்றன.
இந்தச் சம்பவம் தொடர்பாகக் கருத்துத் தெரிவித்த தினகரன், “மின் மயானத்திற்கு வருபவர்கள் ஜெனரேட்டரையும் உடன் கொண்டு வர வேண்டுமா?” எனக் கேள்வி எழுப்பினார்.
மேலும், ஜெனரேட்டரை மின்வாரியமே ஏற்பாடு செய்ததாகச் சமூக வலைத்தளங்களில் தகவல் வெளியிடப்பட்டதாகவும், அது உண்மையல்ல எனப் பாதிக்கப்பட்ட நபர் காணொளி மூலம் தெரிவித்துள்ளதாகவும் அவர் குற்றம்சாட்டினார். மக்களின் துயரமான நேரத்திலும் விளம்பரத்திற்கு முக்கியத்துவம் அளிப்பதாக எரிசக்தித் துறையை விமர்சித்த அவர், மின்தடைப் பிரச்சினைகளுக்குத் தீர்வு காண அரசு உரிய நடவடிக்கை எடுக்க வேண்டும் என வலியுறுத்தினார்.
