நேபாளத்தில் ஏற்பட்டுள்ள அசாதாரண சூழ்நிலையையடுத்து, அங்கு யாத்திரை சென்ற தனது குழுவைச் சேர்ந்த 80 பேரை தற்போது தொடர்புகொள்ள முடியவில்லை என ஈஷா நிறுவனர் ஜக்கி வாசுதேவ் தெரிவித்துள்ளார்.
இதுகுறித்து அவர் வெளியிட்டுள்ள எக்ஸ் தளப் பதிவில் கூறியிருப்பதாவது,
ஈஷா மையத்தில் இருந்து நேப்பாளத்திற்கு யாத்திரை சென்ற 80 பேரை தொடர்பு கொள்ள முடியவில்லை. எங்கள் யாத்திரையில் பங்கேற்ற 21 குழுக்களில், 495 பேர் ஏற்கனவே பாதுகாப்பாகத் திரும்பிவிட்டனர். தற்போது 743 பேர் திபெத்திலும், 148 பேர் நேபாளத்திலும் உள்ளனர்; 77 பேர் குடியேற்றத் துறை மையத்திலும், 3 தன்னார்வலர்கள் நேபாளத்தின் டிமுரே (Timure) பகுதியிலும் உள்ளனர்.
எங்கள் குழுவில் உள்ளவர்கள் மற்றும் இப்பகுதியில் பாதிக்கப்பட்டுள்ள நூற்றுக்கணக்கானோரின் குடும்பத்தினர் மற்றும் அன்புக்குரியவர்களே, உங்கள் துயரத்தில் நானும் பங்கேற்கிறேன்; இந்த மிகக் கடினமான சூழலில் உதவ நாங்கள் எவ்வித முயற்சியையும் கைவிடவில்லை. தற்போதைய சூழலில் செய்யக்கூடிய சிறந்த உதவிகளை உறுதிசெய்ய நான் நேரில் அப்பகுதியில் இருக்கிறேன்” இவ்வாறு அதில் தெரிவிக்கப்பட்டுள்ளது.
நேபாளத்திற்கு யாத்திரை சென்றவர்கள் குறித்த தகவல்களை சேகரித்து வருவதாகவும், அவர்களின் பாதுகாப்பு தொடர்பாக தொடர்ந்து கண்காணித்து வருவதாகவும் அவர் கூறியுள்ளார். தொடர்பு துண்டிக்கப்பட்டுள்ளதால், அவர்களது நிலை குறித்து குடும்பத்தினர் கவலை அடைந்துள்ளனர்.
தொடர்பு வசதிகள் சீரடைந்தவுடன் யாத்திரிகர்களின் நிலை குறித்த கூடுதல் தகவல்கள் வெளியாகும் என எதிர்பார்க்கப்படுகிறது.
