சென்னை பட்டினப்பாக்கம் ஃபோர்ஷோர் எஸ்டேட் பகுதியில் புதிய தலைமைச் செயலகம் மற்றும் சட்டப்பேரவை வளாகம் அமைக்க தமிழக அரசு திட்டமிட்டுள்ளது. சுமார் 25 ஏக்கர் பரப்பளவில் ரூ.1,200 கோடி மதிப்பீட்டில் 15 மாடிகளுடன், 20 லட்சம் சதுர அடி பரப்பளவில் இந்த வளாகம் அமைய உள்ளதாக தகவல்கள் வெளியாகியுள்ளன.
இந்த திட்டத்திற்கு பட்டினப்பாக்கம், முள்ளிக்குப்பம், சீனிவாசபுரம், ராஜீவ்காந்தி நகர் உள்ளிட்ட 9 மீனவ கிராமங்களைச் சேர்ந்த மக்கள் கடும் எதிர்ப்பு தெரிவித்துள்ளனர். புதிய தலைமைச் செயலகம் அமைக்கப்பட்டால் தங்களது பாரம்பரிய வாழ்வாதாரம் மற்றும் மீன்பிடி நடவடிக்கைகள் பாதிக்கப்படும் என அவர்கள் கவலை தெரிவித்துள்ளனர்.
மேலும், ஏற்கனவே பட்டினப்பாக்கம் பகுதியில் போக்குவரத்து நெரிசல் மற்றும் இடப்பற்றாக்குறை நிலவி வரும் நிலையில், தலைமைச் செயலகம் அமைந்தால் மக்கள் நடமாட்டம் மற்றும் வாகனப் போக்குவரத்து மேலும் அதிகரிக்கும் என எதிர்ப்பாளர்கள் கூறுகின்றனர்.
இதற்கிடையில், திட்டத்தை எதிர்த்து அடுத்தகட்ட நடவடிக்கைகள் குறித்து ஆலோசிக்க செப்டம்பர் 15-ஆம் தேதி சீனிவாசபுரத்தில் அனைத்து மீனவ அமைப்புகளின் ஆலோசனைக் கூட்டம் நடைபெற உள்ளதாக தெரிவிக்கப்பட்டுள்ளது. அரசு திட்டத்தை கைவிடாவிட்டால் தொடர் போராட்டங்கள் நடத்தப்படும் என்றும் மீனவ அமைப்புகள் எச்சரித்துள்ளன.
இந்த விவகாரத்தில் பாமக தலைவர் அன்புமணியும் எதிர்ப்பு தெரிவித்துள்ளார். பட்டினப்பாக்கம் எதிர்கால வளர்ச்சிக்கு ஏற்ற இடமல்ல என்றும், சென்னைக்கு வெளியே 500 முதல் 1,000 ஏக்கர் பரப்பளவில் ஒருங்கிணைந்த நிர்வாக நகரத்தை உருவாக்குவது குறித்து அரசு பரிசீலிக்க வேண்டும் என்றும் அவர் வலியுறுத்தியுள்ளார்.
இதனிடையே, 9 மீனவ கிராமங்களின் எதிர்ப்புக்கு மத்தியில் பட்டினப்பாக்கத்தில் புதிய தலைமைச் செயலகம் அமைப்பதற்கான அரசாணையை தமிழக அரசு வெளியிட்டுள்ளது. இதனால் இந்த விவகாரம் மேலும் பரபரப்பை ஏற்படுத்தியுள்ளது.
