அமெரிக்காவில் நடைபெற உள்ள இடைத்தேர்தலை முன்னிட்டு, அதிபர் டொனால்டு டிரம்ப் முக்கியமான தேர்தல் வாக்குறுதியை அறிவித்துள்ளார். நவம்பர் மாதம் நடைபெறும் இடைத்தேர்தலில் குடியரசுக் கட்சி (Republican Party) நாடாளுமன்றத்தின் இரு அவைகளிலும் தனது கட்டுப்பாட்டைத் தக்க வைத்துக்கொண்டால், ஒவ்வொரு வயது வந்த அமெரிக்கருக்கும் 5,000 அமெரிக்க டாலர் (சுமார் ரூ.4.76 லட்சம்) வழங்கப்படும் என்று டிரம்ப் தெரிவித்துள்ளார்.
டல்லாஸ் நகரில் நடைபெற்ற குடியரசுக் கட்சியின் மாநாட்டில் பேசிய டிரம்ப், இந்தத் தொகைக்கு “டிரம்ப் டிவிடெண்ட்” (Trump Dividend) என பெயரிடப்படும் என்று கூறினார். மேலும், இந்தப் பணம் அமெரிக்காவுக்குள் செலவிடப்பட வேண்டும் என்றும் அவர் தெரிவித்துள்ளார்.
தேர்தலை குறிவைத்து புதிய வாக்குறுதி
அமெரிக்க இடைத்தேர்தலில் குடியரசுக் கட்சியின் வெற்றியை உறுதி செய்யும் நோக்கில் இந்த அறிவிப்பு வெளியிடப்பட்டுள்ளதாக பார்க்கப்படுகிறது. பிரதிநிதிகள் சபை மற்றும் செனட் ஆகிய இரு அவைகளிலும் குடியரசுக் கட்சி தொடர்ந்து பெரும்பான்மையை வைத்திருந்தால் மட்டுமே இந்தத் தொகை வழங்கப்படும் என்ற நிபந்தனையை டிரம்ப் முன்வைத்துள்ளார்.
இதன் மூலம் பொருளாதார ரீதியாக பொதுமக்களுக்கு நேரடி பலன் கிடைக்கும் என்ற செய்தியை முன்வைத்து, குடியரசுக் கட்சிக்கு ஆதரவை திரட்ட டிரம்ப் முயற்சி மேற்கொண்டுள்ளார்.
