வீட்டு உபயோக சமையல் எரிவாயு (LPG) சிலிண்டர் வாடிக்கையாளர்கள் e-KYC சரிபார்ப்பை மேற்கொள்வதற்கான காலக்கெடு ஆகஸ்ட் 31-ம் தேதி வரை நீட்டிக்கப்பட்டுள்ளது. ஏற்கெனவே ஆகஸ்ட் 23-ம் தேதி வரை அவகாசம் வழங்கப்பட்டிருந்த நிலையில், வாடிக்கையாளர்களின் கோரிக்கையைத் தொடர்ந்து மேலும் கால அவகாசம் வழங்கப்பட்டுள்ளது.
ஆதார் அடிப்படையிலான e-KYC மூலம் LPG இணைப்புகளின் உண்மைத்தன்மையை உறுதி செய்வதும், போலி அல்லது முறைகேடான இணைப்புகளை கண்டறிவதும் இந்த நடவடிக்கையின் முக்கிய நோக்கமாகக் கூறப்படுகிறது. தகுதியான வாடிக்கையாளர்களுக்கு அரசு மானியம் தொடர்ந்து கிடைப்பதை உறுதி செய்வதற்கும் இந்த சரிபார்ப்பு மேற்கொள்ளப்படுகிறது.
தமிழகத்தில் இதுவரை சுமார் 85 சதவீத LPG வாடிக்கையாளர்கள் e-KYC-யை முடித்துள்ளதாகவும், இன்னும் 50 லட்சத்துக்கும் மேற்பட்டோர் பதிவு செய்ய வேண்டியுள்ளதாகவும் தகவல்கள் தெரிவிக்கின்றன. இதனால், காலக்கெடு முடிவதற்கு முன்பாக e-KYC-யை நிறைவு செய்யுமாறு வாடிக்கையாளர்களுக்கு அறிவுறுத்தப்பட்டுள்ளது.
e-KYC-யை சம்பந்தப்பட்ட கேஸ் நிறுவனத்தின் செயலி மூலம் வீட்டிலிருந்தபடியே மேற்கொள்ளலாம். ஆன்லைனில் செய்ய முடியாதவர்கள் அருகிலுள்ள கேஸ் விநியோக மையத்தை அணுகியும் சரிபார்ப்பை முடித்துக்கொள்ளலாம்.
ஆகஸ்ட் 31 கடைசி அவகாசம் என்பதால், LPG வாடிக்கையாளர்கள் தாமதிக்காமல் e-KYC சரிபார்ப்பை முடித்துக்கொள்ளுமாறு கேட்டுக்கொள்ளப்பட்டுள்ளது.
