இந்தியாவில் கோதுமை மற்றும் கோதுமை சார்ந்த பொருட்களின் ஏற்றுமதிக்கு விதிக்கப்பட்டிருந்த தடையை மத்திய அரசு நீக்கியுள்ளது. இந்தத் தடை நீக்கம் உடனடியாக அமலுக்கு வந்துள்ளதாக வெளிநாட்டு வர்த்தக இயக்குநரகம் (DGFT) அறிவித்துள்ளது.
கோதுமை ஏற்றுமதி கொள்கை இதுவரை “தடை” என்ற நிலையில் இருந்த நிலையில், தற்போது “சுதந்திரமான ஏற்றுமதி” என்ற நிலைக்கு மாற்றப்பட்டுள்ளது. இதன் மூலம் இந்திய ஏற்றுமதியாளர்கள் இனி தனிப்பட்ட ஒதுக்கீடு அல்லது உரிமம் பெற வேண்டிய அவசியமின்றி கோதுமையை வெளிநாடுகளுக்கு ஏற்றுமதி செய்ய முடியும்.
மேலும், கோதுமை மட்டுமின்றி கோதுமை மாவு, மைதா, ரவை, முழுக் கோதுமை மாவு உள்ளிட்ட கோதுமை சார்ந்த பொருட்களின் ஏற்றுமதிக்கும் இருந்த கட்டுப்பாடுகள் நீக்கப்பட்டுள்ளன.
கடந்த 2022-ம் ஆண்டு மே மாதத்தில் உள்நாட்டில் கோதுமை விலை உயர்வைக் கட்டுப்படுத்தும் நோக்கில் ஏற்றுமதிக்கு தடை விதிக்கப்பட்டது. பின்னர், இந்த ஆண்டு பிப்ரவரி மற்றும் ஏப்ரல் மாதங்களில் குறிப்பிட்ட அளவில் கோதுமை ஏற்றுமதிக்கு மத்திய அரசு அனுமதி வழங்கியிருந்தது.
தற்போது நாட்டில் போதுமான கோதுமை கையிருப்பு இருப்பதுடன், 2025-26 பயிர் ஆண்டில் இந்தியாவின் கோதுமை உற்பத்தி சுமார் 120.65 மில்லியன் டன்னாக இருந்ததாக தெரிவிக்கப்பட்டுள்ளது. இதனால் உள்நாட்டு தேவையை பாதிக்காமல் ஏற்றுமதியை அனுமதிக்க முடியும் என மத்திய அரசு தெரிவித்துள்ளது.
கோதுமை ஏற்றுமதி தடை நீக்கப்பட்டதன் மூலம் விவசாயிகளுக்கு நல்ல விலை கிடைப்பதற்கான வாய்ப்பு அதிகரிக்கும் என மத்திய அரசு நம்புகிறது. ஏற்றுமதி வாய்ப்பு அதிகரிப்பது, வரும் ரபி பருவத்தில் விவசாயிகளை அதிகளவில் கோதுமை சாகுபடி செய்ய ஊக்குவிக்கும் என்றும் எதிர்பார்க்கப்படுகிறது.
அதே நேரத்தில், உள்நாட்டு சந்தையில் கோதுமை மற்றும் மாவின் விலை கடுமையாக உயராமல் இருப்பதை உறுதி செய்ய தேவையான நடவடிக்கைகள் எடுக்கப்படும் எனவும் மத்திய அரசு தெரிவித்துள்ளது.
