அரசு தலைமைப் பொறுப்பில் தொடர்ந்து 25 ஆண்டுகளை நிறைவு செய்துள்ள பிரதமர் Narendra Modi, தன்னை தொடர்ந்து ஆதரித்து வரும் நாட்டு மக்களுக்கு நெகிழ்ச்சியுடன் நன்றி தெரிவித்துள்ளார். 2001 அக்டோபர் 7-ஆம் தேதி குஜராத் முதலமைச்சராகப் பதவியேற்ற மோடி, தற்போது 25 ஆண்டுகால அரசு தலைமைப் பயணத்தை நிறைவு செய்துள்ளார்.
டெல்லியில் நடைபெற்ற ‘விக்சித் பாரத் சங்கல்ப் சபா’ நிகழ்ச்சியில் பேசிய பிரதமர் மோடி, 25 ஆண்டுகளுக்கு முன்பு குஜராத் முதலமைச்சராகப் பதவியேற்றபோது இத்தகைய மைல்கல்லை எட்டுவேன் என்று நினைத்ததில்லை எனக் குறிப்பிட்டார். இந்த நீண்ட பயணம் மக்களின் தொடர்ச்சியான ஆதரவு மற்றும் ஆசிகளால் சாத்தியமானது என்றும் தெரிவித்தார்.
“கோடிக்கணக்கான இந்தியர்களின் நம்பிக்கையும், எண்ணற்ற தொண்டர்களின் கடின உழைப்புமே எப்போதும் எனது மிகப்பெரிய பலமாக இருந்து வருகின்றன” என்று கூறிய அவர், மக்கள் தன்னை சேவை செய்யத் தொடர்ந்து தேர்ந்தெடுத்ததற்காக நன்றி தெரிவித்தார். மேலும், தான் இன்று வகிக்கும் பதவிக்கும் அடைந்துள்ள உயரத்திற்கும் மக்களே முக்கிய காரணம் எனக் குறிப்பிட்டார்.
தனது 25 ஆண்டுகால அனுபவம் தனக்கு மட்டும் சொந்தமானது அல்ல; அது நாட்டிற்குச் சொந்தமானது எனக் கூறிய பிரதமர், விமர்சனங்கள் தன்னை சுயபரிசோதனை செய்ய கற்றுக்கொடுத்ததாகவும், சவால்கள் மீண்டும் எழுந்து நிற்க கற்றுக்கொடுத்ததாகவும் தெரிவித்தார்.
மேலும், 140 கோடி இந்தியர்களின் விருப்பங்களை நிறைவேற்றி, வளர்ச்சியடைந்த இந்தியா என்ற இலக்கை நனவாக்க இன்னும் அதிக அர்ப்பணிப்புடன் பணியாற்றுவேன் என்றும் பிரதமர் மோடி உறுதியளித்துள்ளார்.
