அக். 19-ம் தேதி இரவு 8 மணிக்கு தொடக்கம் | சமந்தா ரூத் பிரபு, ஏ.ஆர். ரஹ்மானுடன் பிரம்மாண்ட நிகழ்ச்சிகள்
சென்னை: தமிழ்நாட்டின் மக்கள், கலாசாரம், பாரம்பரியம் மற்றும் அன்றாட வாழ்க்கையின் தனித்துவமான தருணங்களை கொண்டாடும் வகையில், Sony Pictures Networks India (SPNI) நிறுவனத்தின் புதிய தமிழ் பொழுதுபோக்கு சேனலான ‘சோனி விஷா’ (Sony Vizha), வரும் அக்டோபர் 19, 2026 அன்று இரவு 8 மணிக்கு தொடங்குகிறது.
‘இது நம்ம வைபு’ (Ithu Namma Vibe) என்ற பிராண்ட் வாக்குறுதியுடன் களமிறங்கும் சோனி விஷா, இன்றைய தமிழ்நாட்டின் மொழி, கலாசாரம், பாரம்பரியம், கனவுகள் மற்றும் தனித்துவமான வாழ்வியலை பிரதிபலிக்கும் வகையில் பொழுதுபோக்கு நிகழ்ச்சிகளை வழங்க உள்ளது.
உலக அளவில் பிரபலமான நிகழ்ச்சி வடிவங்கள், முன்னணி நட்சத்திரங்கள் மற்றும் தமிழ் ரசிகர்களின் ரசனைக்கேற்ற கதைகள் என அனைத்தையும் ஒருங்கிணைத்து, நவீன பொழுதுபோக்குடன் தமிழ்நாட்டின் கலாசார வேர்களையும் இணைக்கும் வகையில் சேனல் உருவாக்கப்பட்டுள்ளது.
தமிழ்நாட்டின் தனித்துவத்தை வெளிப்படுத்தும் உணவு, இசை, கலகலப்பான உரையாடல்கள், கொண்டாட்டங்கள் மற்றும் மக்களை ஒன்றிணைக்கும் அன்றாட தருணங்கள் என, அனைவருக்கும் நன்கு பரிச்சயமான அம்சங்களே ‘இது நம்ம வைபு’ என்ற கருத்தாக்கத்தின் அடிப்படையாக உள்ளன. தமிழர்களின் வாழ்க்கையையும் கொண்டாட்ட உணர்வையும் மையமாகக் கொண்டு இந்த அனுபவங்களை வெளிப்படுத்தும் வகையில் சோனி விஷாவின் பிராண்ட் திரைப்படம் உருவாக்கப்பட்டுள்ளது.
சமந்தா – ஏ.ஆர். ரஹ்மானுடன் பிரம்மாண்ட தொடக்கம்!
சோனி விஷாவின் தொடக்க நிகழ்ச்சிகளில், உலகின் பிரபலமான இரண்டு பொழுதுபோக்கு நிகழ்ச்சி வடிவங்கள் தமிழ் ரசிகர்களுக்காக பிரத்யேகமாக மாற்றியமைக்கப்பட்டுள்ளன.
அதில் ‘Celebrity MasterChef Tamil’ நிகழ்ச்சியில் பிரபல நடிகை சமந்தா ரூத் பிரபு இடம்பெறுகிறார். அதேபோல், இசை உலகின் முன்னணி ஆளுமையான ஏ.ஆர். ரஹ்மான் இடம்பெறும் ‘Tamil Idol’ நிகழ்ச்சியும் ரசிகர்களை மகிழ்விக்க உள்ளது.
உலகப் புகழ்பெற்ற நிகழ்ச்சி வடிவங்களையும், இந்தியாவின் முன்னணி நட்சத்திரங்களையும் ஒன்றிணைக்கும் இந்த இரண்டு நிகழ்ச்சிகளுடன், தமிழ் பொழுதுபோக்கு உலகில் தனது புதிய பயணத்தை சோனி விஷா தொடங்குகிறது.
