சென்னை மெட்ரோ ரயில் இரண்டாம் கட்டத் திட்டத்தின் கீழ் அமைக்கப்பட்டுள்ள பூந்தமல்லி புறவழிச்சாலை – வடபழனி இடையேயான புதிய மெட்ரோ ரயில் சேவை அக்டோபர் 11-ஆம் தேதி தொடங்கப்பட உள்ளது. பிரதமர் நரேந்திர மோடி இந்த சேவையைத் தொடங்கி வைக்கிறார்
சென்னை மெட்ரோ 2-ஆம் கட்டத் திட்டத்தில் மொத்தம் 118.9 கி.மீ. தொலைவுக்கு 3 வழித்தடங்கள் அமைக்கப்பட்டு வருகின்றன. இதில் பொதுமக்கள் பயன்பாட்டுக்கு வரும் முதல் பகுதியாக பூந்தமல்லி புறவழிச்சாலை முதல் வடபழனி வரையிலான 14.64 கி.மீ. வழித்தடம் தயாராகியுள்ளது.
இந்த வழித்தடத்தில் 11 உயர்மட்ட மெட்ரோ நிலையங்கள் இடம்பெற்றுள்ளன. பூந்தமல்லி புறவழிச்சாலை, குமணன்சாவடி, காட்டுப்பாக்கம், ஐயப்பன்தாங்கல், போரூர் சந்திப்பு, ஆலப்பாக்கம், காரம்பாக்கம், வளசரவாக்கம், ஆழ்வார்திருநகர், விருகம்பாக்கம் மற்றும் வடபழனி ஆகிய பகுதிகள் இதன் மூலம் இணைக்கப்படுகின்றன.
புதிய சேவை பயன்பாட்டுக்கு வந்ததும் பூந்தமல்லி, போரூர், வளசரவாக்கம், வடபழனி உள்ளிட்ட பகுதிகளுக்கு இடையேயான பொதுப் போக்குவரத்து இணைப்பு மேம்பட்டு, பயண நேரமும் சாலை போக்குவரத்து நெரிசலும் குறையும் என எதிர்பார்க்கப்படுகிறது.
அக்டோபர் 11 அன்று சென்னை வர உள்ள பிரதமர் மோடி, சென்னை ஐஐடியில் நடைபெறும் நிகழ்ச்சியிலும் பங்கேற்று சில தேசிய நெடுஞ்சாலை மற்றும் இந்தியன் ஆயில் திட்டங்களையும் தொடங்கி வைக்க உள்ளதாக செய்திகள் தெரிவிக்கின்றன. மெட்ரோ தொடக்க விழாவில் தமிழக முதலமைச்சர் விஜய்யும் பங்கேற்க உள்ளதாக தெரிவிக்கப்பட்டுள்ளது.
