பணி நிரந்தரம், பணிப் பாதுகாப்பு, சம வேலைக்கு சம ஊதியம், ஊதிய உயர்வு மற்றும் நிலுவை ஊக்கத்தொகை உள்ளிட்ட கோரிக்கைகளை வலியுறுத்தி, தமிழ்நாடு இடைநிலை சுகாதாரப் பணியாளர்கள் சங்கத்தைச் சேர்ந்த செவிலியர்கள் சென்னை எழும்பூர் ராஜரத்தினம் மைதானம் அருகே உண்ணாவிரதப் போராட்டத்தில் ஈடுபட்டனர். போராட்டத்தின்போது செவிலியர்களுக்கும் காவல்துறையினருக்கும் இடையே தள்ளுமுள்ளு ஏற்பட்டதுடன், பலர் வலுக்கட்டாயமாக கைது செய்யப்பட்டனர்.
இந்த சம்பவத்துக்கு அதிமுக பொதுச் செயலாளர் எடப்பாடி பழனிசாமி கடும் கண்டனம் தெரிவித்துள்ளார். கோரிக்கைகளை நிறைவேற்ற வலியுறுத்தி அறவழியில் போராடிய செவிலியர்கள் மீது காவல்துறை மேற்கொண்ட நடவடிக்கை “கொடூரத்தின் உச்சம்” என்று அவர் விமர்சித்துள்ளார்.
மேலும், போராட்டம் நடைபெற்ற இடத்தில் மின்சாரம் துண்டிக்கப்பட்டதாகவும், பேச்சுவார்த்தைக்கு அழைத்துச் செல்வதாகக் கூறி செவிலியர்கள் கைது செய்யப்பட்டதாகவும் குற்றம்சாட்டிய இபிஎஸ், ஆட்சிக்கு வருவதற்கு முன்பு செவிலியர்களுக்கு ஆதரவாகப் பேசியவர்கள் தற்போது அவர்களின் போராட்டத்தை ஒடுக்குவது ஏன் என்றும் கேள்வி எழுப்பினார்.
செவிலியர்களின் பிரச்சினையில் சுகாதாரத்துறை அமைச்சர் நேரடியாகத் தலையிட்டு பேச்சுவார்த்தை நடத்தாததையும் அவர் விமர்சித்தார். கைது செய்யப்பட்ட செவிலியர்களை விடுவித்து, அவர்கள் மீது வழக்குப் பதிவு செய்யாமல், ஜனநாயக முறையில் பேச்சுவார்த்தை நடத்தி கோரிக்கைகளுக்குத் தீர்வு காண வேண்டும் என்று தமிழக அரசை எடப்பாடி பழனிசாமி வலியுறுத்தினார்.
