இந்தியாவுக்குச் சுற்றுப்பயணம் மேற்கொண்ட ஆப்கானிஸ்தான் கிரிக்கெட் அணி, 3 போட்டிகள் கொண்ட டி20 தொடரில் விளையாடியது. முதல் இரண்டு போட்டிகளிலும் வெற்றிபெற்ற இந்திய அணி, தொடரை ஏற்கெனவே கைப்பற்றியது.
இந்நிலையில், இரு அணிகளுக்கும் இடையிலான 3-வது மற்றும் கடைசி டி20 போட்டி டெல்லியில் நேற்று நடைபெற்றது. டாஸ் வென்ற ஆப்கானிஸ்தான் அணி பந்துவீச்சைத் தேர்வு செய்தது. முதலில் பேட்டிங் செய்த இந்திய அணி, 20 ஓவர்கள் முடிவில் 7 விக்கெட்டுகளை இழந்து 221 ரன்கள் குவித்தது. அதிரடியாக விளையாடிய தொடக்க வீரர் அபிஷேக் சர்மா, 34 பந்துகளில் 108 ரன்கள் விளாசினார். ஆப்கானிஸ்தான் தரப்பில் அஸ்மதுல்லா உமர்சாய் 2 விக்கெட்டுகளை வீழ்த்தினார்.
222 ரன்கள் எடுத்தால் வெற்றி என்ற கடினமான இலக்குடன் களமிறங்கிய ஆப்கானிஸ்தான் அணி, இந்திய வீரர்களின் சிறப்பான பந்துவீச்சைச் சமாளிக்க முடியாமல் 94 ரன்களுக்கு ஆட்டமிழந்தது. அந்த அணியின் கேப்டன் இப்ராகிம் அதிகபட்சமாக 25 ரன்கள் எடுத்தார். இந்திய அணியின் நிதீஷ் குமார் மற்றும் ரவி பிஷ்னோய் தலா 3 விக்கெட்டுகளை வீழ்த்தினர்.
இதன்மூலம் ஆப்கானிஸ்தானை 127 ரன்கள் வித்தியாசத்தில் வீழ்த்திய இந்தியா அபார வெற்றி பெற்றது. அத்துடன், 3 போட்டிகள் கொண்ட டி20 தொடரை 3-0 என்ற கணக்கில் முழுமையாகக் கைப்பற்றி ஆப்கானிஸ்தானை ‘ஒயிட்வாஷ்’ செய்தது.
