சென்னை: கடந்த ஆறு மாதங்களாக ரேஷன் கடைகளில் உணவுப் பொருட்களைப் பெறாமல் இருக்கும் பயனாளிகளின் ரேஷன் உரிமைகளை அக்டோபர் 1, 2026 முதல் தற்காலிகமாக முடக்கும் நடவடிக்கை மேற்கொள்ளப்பட உள்ளதாக தகவல் வெளியாகியுள்ளது. நாடு முழுவதும் சுமார் 1.58 கோடி பயனாளிகள் இந்த நடவடிக்கையின் கீழ் வருவதாக செய்திகள் தெரிவிக்கின்றன.
தேசிய உணவுப் பாதுகாப்புச் சட்டத்தின் கீழ் நாடு முழுவதும் சுமார் 20.4 கோடி ரேஷன் அட்டைகள் மூலம் 80.6 கோடி பேர் பயனடைந்து வருகின்றனர். பயன்பாட்டில் இல்லாத பதிவுகள், ஒரே நபரின் பெயர் ஒன்றுக்கும் மேற்பட்ட அட்டைகளில் இருப்பது, இறந்தவர்கள் அல்லது இடம்பெயர்ந்தவர்களின் பெயர்கள் தொடர்வது போன்றவற்றைக் கண்டறிந்து பொது விநியோகத் திட்டத்தின் தரவுத்தளத்தைச் சீரமைக்கும் நடவடிக்கையின் ஒரு பகுதியாக இது மேற்கொள்ளப்படுகிறது.
முதற்கட்டமாக தற்காலிகமாக மட்டுமே முடக்கப்படும். சம்பந்தப்பட்ட பயனாளிகளின் பெயர்கள் உடனடியாக ரேஷன் தரவுத்தளத்திலிருந்து நீக்கப்படாது. தங்களது தகுதியை உறுதி செய்வதற்கு 3 மாத கால அவகாசம் வழங்கப்படும்.
இந்தக் காலத்திற்குள் e-KYC சரிபார்ப்பை முடிக்க வேண்டும். தேவைப்படும் இடங்களில் கள ஆய்வும் மேற்கொள்ளப்படும். பயனாளியின் தகுதி உறுதி செய்யப்பட்டால், முடக்கப்பட்ட ரேஷன் உரிமை மீண்டும் செயல்படுத்தப்பட்டு உணவுப் பொருட்கள் தொடர்ந்து வழங்கப்படும்.
