கல்லூரி கலாட்டா, காதல், நகைச்சுவை…
மனதை வருடும் உணர்வுகள், காதல் மற்றும் நகைச்சுவை கலந்த ஃபீல்குட் ரொமான்டிக் காமெடி திரைப்படமான ‘ஹைக்கூ’ படத்தின் டிரெய்லர் வெளியாகி ரசிகர்களிடம் வரவேற்பைப் பெற்று வருகிறது.
ஏகன், ஸ்ரீதேவி, ஃபெமினா ஜார்ஜ் ஆகியோர் முன்னணி கதாபாத்திரங்களில் நடித்துள்ள இப்படத்தை யுவராஜ் சின்னசாமி எழுதி இயக்கியுள்ளார். விஷன் சினிமா ஹவுஸ் சார்பில் டாக்டர் டி. அருளானந்து, மேத்யூ அருளானந்து தயாரித்துள்ளனர்.
145 விநாடிகள் கொண்ட டிரெய்லரில் கல்லூரி கலாட்டா, காதல், நகைச்சுவை மற்றும் உணர்வுப்பூர்வமான காட்சிகள் இடம்பெற்றுள்ளன. பெண்கள் மட்டுமே படிக்கும் கல்லூரியில் ஒரே ஒரு மாணவனாக மனோ சேரும்போது ஏற்படும் எதிர்பாராத சம்பவங்களே கதையின் மையமாக அமைந்துள்ளன.
‘கோர்ட்: ஸ்டேட் Vs நோபடி’ படத்தின் மூலம் கவனம் ஈர்த்த ஸ்ரீதேவி, ஃபெமினா ஜார்ஜ் ஆகியோருடன் ஏகனின் எனர்ஜியும் கதையின் மீதான எதிர்பார்ப்பை அதிகரித்துள்ளது. அதிர்ச்சி அருண், சுப்ரமணிய சேது, அதியமான், மைம் கோபி, இந்துமதி மணிகண்டன் உள்ளிட்டோரும் முக்கிய கதாபாத்திரங்களில் நடித்துள்ளனர்.
படம் குறித்து நடிகர் ஏகன் கூறுகையில்,
“இது ஃபீல்குட் ரொமான்டிக் காமெடி என்றாலும், பெண்களை மதிப்பது மற்றும் அவர்களைப் பற்றிய ஆண்களின் பார்வை மாற வேண்டும் என்ற ஆழமான கருத்தையும் இயல்பாகக் கொண்டுள்ளது. எந்த கருத்தையும் போதிக்காமல், ரசிக்கக்கூடிய பொழுதுபோக்கு படமாக உருவாக்கியுள்ளோம்” என்றார்.
சித்து குமார் இசையமைக்க, பிரியேஷ் குருசாமி ஒளிப்பதிவு செய்துள்ளார். சக்தி பிரணீஷ்.பி படத்தொகுப்பு பணிகளை மேற்கொண்டுள்ளார். தமிழ்நாடு முழுவதும் சக்தி ஃபிலிம் ஃபேக்டரி சார்பில் பி. சக்திவேலன் வெளியிடும் இப்படம், வரும் அக்டோபர் 23-ம் தேதி உலகம் முழுவதும் திரையரங்குகளில் வெளியாகிறது.
