சென்னை:
தமிழகத்தில் தனியார் நிறுவனங்களின் பால் விலை இன்று (செப்.26) முதல் லிட்டருக்கு ரூ.4 வரை உயர்த்தப்பட்டுள்ளதற்கு பாமக தலைவர் அன்புமணி ராமதாஸ் கண்டனம் தெரிவித்துள்ளார். ஏழை மற்றும் நடுத்தர மக்கள் அன்றாடம் பயன்படுத்தும் பாலின் விலையை தனியார் நிறுவனங்கள் தொடர்ந்து உயர்த்துவது கண்டிக்கத்தக்கது என்று அவர் வெளியிட்ட அறிக்கையில் தெரிவித்துள்ளார்.
ஆவின் பால் கொள்முதல் விலையை தமிழக அரசு அண்மையில் லிட்டருக்கு ரூ.6 உயர்த்தியது. இதைத் தொடர்ந்து தனியார் நிறுவனங்களும் கொள்முதல் விலையை உயர்த்திய நிலையில், டோட்லா, ஹெரிடேஜ், திருமலா, சீனிவாசா உள்ளிட்ட நிறுவனங்களின் பால் விலை இன்று முதல் உயர்ந்துள்ளது. சில வகை பால்களின் விலை லிட்டருக்கு ரூ.4 வரையும், தயிர் விலை கிலோவுக்கு ரூ.2 வரையும் அதிகரிக்கப்பட்டுள்ளது.
இந்த விலை உயர்வால் குடும்பங்களின் மாதாந்திர செலவு மேலும் அதிகரிக்கும் என்று குறிப்பிட்டுள்ள அன்புமணி, தனியார் பால் நிறுவனங்களின் விலை நிர்ணயத்தை தமிழக அரசு முறைப்படுத்த வேண்டும் என்றும் வலியுறுத்தியுள்ளார்.
