சேலத்தில் பெண்களுக்கான கட்டணமில்லா பேருந்து பயணத் திட்டத்தை விரிவுபடுத்தும் அரசின் முடிவுக்கு எதிர்ப்பு தெரிவித்து, தனியார் பேருந்து ஓட்டுநர்கள் மற்றும் நடத்துநர்கள் இன்று ஒருநாள் அடையாள வேலைநிறுத்தப் போராட்டத்தில் ஈடுபட்டுள்ளனர்.
தமிழ்நாட்டில் தற்போது மாநகர மற்றும் நகரப் பகுதிகளில் இயக்கப்படும் சாதாரண அரசுப் பேருந்துகளில் பெண்களுக்கு இலவசப் பயணத் திட்டம் நடைமுறையில் உள்ளது. இந்தத் திட்டத்தை மேலும் விரிவுபடுத்தி, வரும் அக்டோபர் 2ஆம் தேதி முதல் விரைவு, எல்எஸ்எஸ் மற்றும் டீலக்ஸ் பேருந்துகளிலும் பெண்கள் கட்டணமின்றி பயணிக்கலாம் என முதலமைச்சர் விஜய் சட்டப்பேரவையில் அறிவித்துள்ளார்.
இந்த அறிவிப்புக்கு எதிர்ப்பு தெரிவித்துள்ள சேலம் தனியார் பேருந்து ஓட்டுநர்கள் மற்றும் நடத்துநர்கள், இலவசப் பயணத் திட்டத்தால் தங்களது வருவாய் மற்றும் வாழ்வாதாரம் பாதிக்கப்படும் எனக் கூறி போராட்டத்தில் ஈடுபட்டுள்ளனர்.
இதன் காரணமாக, சேலம் புதிய பேருந்து நிலையத்தில் இருந்து பல்வேறு வழித்தடங்களில் இயக்கப்படும் தனியார் பேருந்துகள் இன்று இயக்கப்படவில்லை. இதனால் சில வழித்தடங்களில் பேருந்து போக்குவரத்து பாதிக்கப்பட்டுள்ளதாக தெரிவிக்கப்பட்டுள்ளது.
இலவசப் பயணத் திட்டத்தை ரத்து செய்ய வேண்டும் என்றும், இல்லையெனில் தனியார் பேருந்து தொழிலாளர்களின் வாழ்வாதாரம் கடுமையாக பாதிக்கப்படும் என்றும் போராட்டத்தில் ஈடுபட்டவர்கள் வலியுறுத்தியுள்ளனர்.
அரசின் திட்டம் மற்றும் தனியார் பேருந்து தொழிலாளர்களின் எதிர்ப்பு ஆகியவற்றுக்கு இடையே ஏற்பட்டுள்ள இந்த விவகாரத்தில், அடுத்தகட்ட நடவடிக்கை குறித்து கவனம் செலுத்தப்பட்டு வருகிறது.
