பழநி: திண்டுக்கல் மாவட்டம் பழநியில் உள்ள தண்டபாணி சுவாமி மடத்துக்குச் சொந்தமான சுமார் ரூ.100 கோடி மதிப்பிலான நிலத்தை மோசடியாக பத்திரப்பதிவு செய்ததாகக் கூறப்படும் வழக்கில், மேலும் 2 பேரை சிபிசிஐடி போலீசார் இன்று (அக்.7) கைது செய்துள்ளனர்.
இந்த வழக்கில், பழநி சார்பதிவாளர் அலுவலக உதவியாளர் சிவசங்கரி மற்றும் ஒட்டன்சத்திரத்தைச் சேர்ந்த வழக்கறிஞர் சிவகுமார் ஆகியோர் கைது செய்யப்பட்டுள்ளனர். போலி பத்திரப்பதிவுக்கு சிவசங்கரி உதவியதாகவும், போலி பத்திரத்தை தயாரித்துக் கொடுத்ததில் சிவகுமாருக்கு தொடர்பு இருப்பதாகவும் சிபிசிஐடி தரப்பில் குற்றம்சாட்டப்பட்டுள்ளது.
தண்டபாணி சுவாமி மடத்துக்குச் சொந்தமான சுமார் 1.40 ஏக்கர் நிலம் ரூ.100 கோடி மதிப்புடையதாகக் கூறப்படும் நிலையில், அது தனிநபர்களுக்கு மிகக் குறைந்த மதிப்பில் பதிவு செய்யப்பட்டதாக புகார் எழுந்தது. இதுதொடர்பாக இந்து சமய அறநிலையத் துறை அளித்த புகாரின் அடிப்படையில் வழக்கு பதிவு செய்யப்பட்டு, பின்னர் விசாரணை சிபிசிஐடிக்கு மாற்றப்பட்டது.
இந்த வழக்கில் ஏற்கனவே இடைநீக்கம் செய்யப்பட்ட சார்பதிவாளர் ஜஸ்டின் மணிகண்டன் உள்ளிட்ட 6 பேர் கைது செய்யப்பட்டிருந்தனர். தற்போது மேலும் இருவர் கைது செய்யப்பட்டுள்ளதால், கைது செய்யப்பட்டவர்களின் எண்ணிக்கை 8 ஆக உயர்ந்துள்ளது.
இதுவரை நடத்தப்பட்ட விசாரணையின் அடிப்படையில் குற்றப்பத்திரிகை தாக்கல் செய்வதற்கான நடவடிக்கைகளையும் சிபிசிஐடி தீவிரப்படுத்தி வருகிறது.
