தாராபுரம் சட்டப்பேரவைத் தொகுதி இடைத்தேர்தல் வாக்குப்பதிவின்போது, வாக்குச்சாவடிக்கு வந்த மூதாட்டி ஒருவரை ‘விசில்’ சின்னத்திற்கு வாக்களிக்குமாறு தேர்தல் அலுவலர் கூறியதாக புகார் எழுந்துள்ளது.
வாக்களிக்க வந்த மூதாட்டிக்கு உதவி செய்வதாகக் கூறி குறிப்பிட்ட சின்னத்திற்கு வாக்களிக்க அறிவுறுத்தியதாக அரசியல் கட்சியினர் தரப்பில் குற்றச்சாட்டு முன்வைக்கப்பட்டது. இதையடுத்து சம்பவம் தொடர்பாக தேர்தல் அதிகாரிகளிடம் புகார் அளிக்கப்பட்டது.
புகாரின் அடிப்படையில் விசாரணை மேற்கொண்ட தேர்தல் நிர்வாகம், சம்பந்தப்பட்ட தேர்தல் அலுவலர் தங்கமணியை உடனடியாக மாற்றி, அவருக்குப் பதிலாக வேறு அலுவலரை நியமித்துள்ளது.
இடைத்தேர்தல் வாக்குப்பதிவு நடைபெறும் நிலையில் தேர்தல் பணியில் ஈடுபடும் அதிகாரிகள் நடுநிலையுடன் செயல்பட வேண்டும் என்ற விதிமுறையை மீறியதாக எழுந்த இந்தப் புகார் தாராபுரம் தொகுதியில் பரபரப்பை ஏற்படுத்தியுள்ளது.
