வித்தியாசமான முயற்சியில் அசத்திய படக்குழு
திரைப்படங்களின் போஸ்டர், ஃபர்ஸ்ட் லுக், டீசர், டிரெய்லர் வெளியீடுகளில் புதுமையை புகுத்தி வரும் நிலையில், ‘துரோகம் பழகு’ படக்குழு நடுக்கடலில் போஸ்டரை வெளியிட்டு கவனம் ஈர்த்துள்ளது.
மகிழ் புரொடக்ஷன்ஸ் சார்பில் C. பியூலா மகிழ் தயாரிப்பில் உருவாகியுள்ள இப்படத்தின் போஸ்டர், புதுச்சேரி நடுக்கடலில் மீனவர்கள் மூலம் வெளியிடப்பட்டது. படக்குழுவினர் ஏற்பாடு செய்திருந்த நிகழ்வில் நடுக்கடலுக்குச் சென்ற மீனவர்கள், ‘துரோகம் பழகு’ படத்தின் போஸ்டரை கைகளில் ஏந்தி வெளியிட்டனர்.
கடலின் நடுவே மீனவர்களின் கைகளில் போஸ்டர் வெளியான காட்சிகள், படக்குழுவின் வித்தியாசமான முயற்சியாக அமைந்துள்ளன.
இப்படத்தில் தக்க்ஷன் விஜய் கதாநாயகனாக நடித்துள்ளார். ஜி.எம். குமார், வனிதா விஜயகுமார், லொள்ளு சபா ஜீவா, அமுதவாணன், அப்புகுட்டி, திவாகர், கஞ்சா கருப்பு உள்ளிட்டோர் முக்கிய கதாபாத்திரங்களில் நடித்துள்ளனர். சீயோன் ராஜா இயக்கியுள்ள இப்படத்திற்கு ராஜா மற்றும் பாலா இசையமைத்துள்ளனர்.
வித்தியாசமான முறையில் போஸ்டரை வெளியிட்டு எதிர்பார்ப்பை ஏற்படுத்தியுள்ள ‘துரோகம் பழகு’ படத்தின் இசை மற்றும் டிரெய்லர் வெளியீட்டு விழா விரைவில் பிரம்மாண்டமாக நடைபெற உள்ளது.
