பணி நிரந்தரம் உள்ளிட்ட பல்வேறு கோரிக்கைகளை வலியுறுத்தி, சென்னை எழும்பூர் ராஜரத்தினம் விளையாட்டு அரங்கம் அருகே செவிலியர்கள் மற்றும் இடைநிலை சுகாதாரப் பணியாளர்கள் இன்று உண்ணாவிரதப் போராட்டத்தில் ஈடுபட்டுள்ளனர்.
இதற்கிடையே, தமிழகத்தில் காலியாக உள்ள 4,724 செவிலியர் பணியிடங்களை 11 மாத தற்காலிக ஒப்பந்த அடிப்படையில் நிரப்பும் நடவடிக்கையை கைவிட்டு, நிரந்தர அடிப்படையில் பணியிடங்களை நிரப்ப வேண்டும் என்பதும் செவிலியர் அமைப்புகளின் முக்கிய கோரிக்கையாக உள்ளது. தற்காலிக நியமன முறை செவிலியர்களின் பணிப் பாதுகாப்பையும் எதிர்காலத்தையும் பாதிக்கும் என அவர்கள் தெரிவித்து வருகின்றனர்.
அரசு தங்களது கோரிக்கைகளை ஏற்று, ஒப்பந்த மற்றும் தற்காலிக நியமன முறையைக் கைவிட்டு நிரந்தரப் பணியிடங்களை உருவாக்க வேண்டும் என்றும் போராட்டத்தில் ஈடுபட்டவர்கள் வலியுறுத்தியுள்ளனர். கோரிக்கைகள் நிறைவேற்றப்படாவிட்டால் அடுத்தகட்ட போராட்டங்கள் முன்னெடுக்கப்படும் என்றும் செவிலியர் அமைப்புகள் ஏற்கெனவே தெரிவித்துள்ளன.
