சென்னையில் இன்று காலை புறநகர் மின்சார ரயில் தடம் புரண்டதால், தாம்பரம் – சென்னை கடற்கரை வழித்தடத்தில் ரயில் போக்குவரத்து கடுமையாக பாதிக்கப்பட்டது. இதனால் பல்வேறு ரயில் நிலையங்களில் பயணிகள் காத்திருக்க வேண்டிய நிலை ஏற்பட்டது.
தாம்பரத்தில் இருந்து சென்னை கடற்கரை நோக்கி இயக்கப்பட்ட புறநகர் மின்சார ரயில், சென்னை கோட்டை ரயில் நிலையம் அருகே சென்றபோது விபத்துக்குள்ளானது. ரயிலின் 5-வது பெட்டியின் சக்கரம் தண்டவாளத்தை விட்டு விலகி தடம் புரண்டது
விபத்தைத் தொடர்ந்து தாம்பரம் – சென்னை கடற்கரை வழித்தடத்தில் மின்சார ரயில் சேவை தற்காலிகமாக நிறுத்தப்பட்டது. மேலும், தாம்பரம் மற்றும் செங்கல்பட்டில் இருந்து சென்னை கடற்கரை நோக்கி வந்த சில புறநகர் ரயில்கள் நடுவழியில் நிறுத்தப்பட்டன.
தகவல் அறிந்த ரயில்வே ஊழியர்கள் சம்பவ இடத்துக்கு விரைந்து சென்று, தடம் புரண்ட பெட்டியை மீண்டும் தண்டவாளத்தில் நிலைநிறுத்தி ரயில் சேவையை சீரமைக்கும் பணியில் தீவிரமாக ஈடுபட்டுள்ளனர். விபத்துக்கான காரணம் குறித்து அதிகாரிகள் விசாரணை நடத்தி வருகின்றனர்.
காலாண்டுத் தேர்வு விடுமுறை மற்றும் காந்தி ஜெயந்தி தொடர் விடுமுறை முடிந்து ஏராளமானோர் வெளியூர்களில் இருந்து சென்னைக்குத் திரும்பியதால், இன்று காலை புறநகர் ரயில்களில் வழக்கத்தைவிட அதிக கூட்டம் காணப்பட்டது. இந்த நேரத்தில் ஏற்பட்ட விபத்தால் பயணிகள் பெரும் சிரமத்திற்கு ஆளாகினர்.
