ஐந்து நண்பர்களின் நட்பு, கனவு, வாழ்க்கைப் போராட்டங்களை மையமாகக் கொண்டு உருவாகி வரும் புதிய திரைப்படம் ‘பீட்சா பாய்ஸ்’. இப்படத்தின் மூலம் சிவம் சங்கர் கதாநாயகனாக அறிமுகமாகிறார். அவருடன் சரத் லோகிதஸ்வா, ஷோப்ராஜ் உள்ளிட்ட பலர் முக்கிய கதாபாத்திரங்களில் நடித்துள்ளனர்.
செவன் ஹில்ஸ் சினி கிரியேஷன் சார்பில் சங்கர் கே.என். மற்றும் சஹானா சங்கர் இணைந்து இப்படத்தைத் தயாரிக்கின்றனர். படத்தின் கதை, திரைக்கதை, இயக்கம் மற்றும் இசைப் பொறுப்புகளை சேகர் கேசவ் சிரின் ஏற்றுள்ளார். குரு பிரசாத் ஒளிப்பதிவு செய்துள்ளார்.
பெங்களூருவை மையமாகக் கொண்ட இப்படத்தின் படப்பிடிப்பு அந்நகரில் பல்வேறு பகுதிகளில் நடைபெற்றுள்ளது. சமகால நகர வாழ்க்கையை பின்னணியாகக் கொண்டு உருவாகியிருப்பதால், பெங்களூருவின் பரபரப்பான சூழலும் கதையின் முக்கிய அங்கமாக இடம்பெறுகிறது.
சொந்த ஊரை விட்டு வெளியேறி, தங்களுக்கென ஒரு புதிய வாழ்க்கையை உருவாக்க வேண்டும் என்ற கனவுடன் 5 நண்பர்கள் பெங்களூருவுக்கு செல்கின்றனர். புதிய நகரம், புதிய மனிதர்கள், புதிய அனுபவங்கள் என அவர்களின் வாழ்க்கைப் பயணம் எதிர்பாராத திருப்பங்களை சந்திக்கிறது. அந்தச் சூழலில் அவர்கள் எதிர்கொள்ளும் சவால்களும், அதை நண்பர்களாக இணைந்து எப்படி சமாளிக்கிறார்கள் என்பதுமே படத்தின் கதைக்களமாக அமைந்துள்ளது.
நட்பை மையமாகக் கொண்டிருந்தாலும், இளைஞர்களின் கனவு, நகர வாழ்க்கையின் சவால்கள், உறவுகள் மற்றும் எதிர்பாராத சம்பவங்கள் என பல்வேறு அம்சங்களை விறுவிறுப்பான திரைக்கதையுடன் சொல்லும் வகையில் இப்படம் உருவாகியுள்ளது.
குறிப்பாக, பெங்களூருவின் சமகால நகரப் பின்னணியும் 5 நண்பர்களின் வாழ்க்கையும் இணைந்து பயணிப்பதால், ‘பீட்சா பாய்ஸ்’ திரைப்படம் பார்வையாளர்களுக்கு வித்தியாசமான அனுபவத்தை வழங்கும் என படக்குழுவினர் தெரிவித்துள்ளனர். சிவம் சங்கரின் கதாநாயகன் அறிமுகம் என்பதால், இப்படம் அவரது திரைப்பயணத்தில் முக்கியமான படமாக அமையும் என எதிர்பார்க்கப்படுகிறது.
