கேப்டன் சினி கிரியேஷன்ஸ் தயாரிப்பில் உருவாகி வரும் ‘கிங் அண்ட் குயின்ஸ்’ திரைப்படத்தின் படப்பிடிப்பு சென்னையில் படுவேகமாக நடைபெற்று வருகிறது.
சண்முக பாண்டியன் கதாநாயகனாக நடிக்க, அவருக்கு ஜோடியாக ஆதியா பிரசாத் நடிக்கிறார். இருவரையும் மையமாக வைத்து உருவாகும் இப்படத்தில், கதை மற்றும் திரைக்கதைக்கு வலு சேர்க்கும் வகையில் முன்னணி நட்சத்திரங்கள் பலரும் இணைந்துள்ளனர்.
இளவரசு, பிரகதி, தம்பி ராமையா, ரமேஷ் திலக், சுனில், படூர் ரமேஷ், ‘பூவே உனக்காக’ புகழ் சங்கீதா, அஞ்சலி நாயர், மைனா நந்தினி, இந்திரஜா ரோபோ சங்கர், பட்டிமன்றம் ராஜா, நிகிலா ஷங்கர், மகிழ் திருமேனி உள்ளிட்ட பலர் முக்கிய கதாபாத்திரங்களில் நடித்து வருகின்றனர்.
இத்தனை நட்சத்திரங்கள் ஒரே படத்தில் குவிந்துள்ளதால் ‘கிங் அண்ட் குயின்ஸ்’ படத்தின் மீதான எதிர்பார்ப்பும் எகிறியுள்ளது. படத்தின் முக்கிய காட்சிகளை விறுவிறுப்பாக படமாக்கி வரும் இயக்குநர் மணிசேயோன், ரசிகர்களுக்கு புதுமையான திரை அனுபவத்தை வழங்கும் முயற்சியில் ஈடுபட்டுள்ளார்.
படத்திற்கு பிரசன்ன குமார் ஒளிப்பதிவு செய்கிறார். மனு இரவிச்சந்திரன் இசையமைக்கிறார். சதீஷ் சூர்யா படத்தொகுப்பு பணிகளை மேற்கொள்கிறார்.
ஒரே நேரத்தில் ‘வாணவேடிக்கை’ மற்றும் ‘கிங் அண்ட் குயின்ஸ்’ என இரண்டு திரைப்படங்களின் படப்பிடிப்பையும் கேப்டன் சினி கிரியேஷன்ஸ் நிறுவனம் பரபரப்பாக முன்னெடுத்து வருகிறது. இதனால் அடுத்தடுத்து வெளியாகும் இந்த படங்கள் குறித்த எதிர்பார்ப்பு ரசிகர்கள் மத்தியில் அதிகரித்து வருகிறது.
