தமிழகத்தில் ஓட்டுநர் உரிமம் (Driving Licence), வாகனப் பதிவுச் சான்று (RC) உள்ளிட்ட ஆவணங்களை டிஜிட்டல் முறையில் மட்டுமே வழங்கும் தமிழக அரசின் அரசாணையை எதிர்த்து தொடரப்பட்ட வழக்கில், தமிழக அரசு பதிலளிக்க சென்னை உயர் நீதிமன்றம் உத்தரவிட்டுள்ளது.
டிஜிட்டல் ஓட்டுநர் உரிமம் மற்றும் RC-ஐ பொதுமக்களே பதிவிறக்கம் செய்துகொள்ளும் நடைமுறை செப்டம்பர் 12 முதல் அமலுக்கு வந்ததாக தெரிவிக்கப்பட்டுள்ளது. இது தொடர்பாக செப்டம்பர் 10-ஆம் தேதி தமிழக அரசு அரசாணை பிறப்பித்தது.
இந்த அரசாணையை எதிர்த்து பெங்களூரைச் சேர்ந்த தனியார் நிறுவனம் சென்னை உயர் நீதிமன்றத்தில் வழக்கு தொடர்ந்தது. தமிழக அரசின் நடவடிக்கை மத்திய மோட்டார் வாகனச் சட்டப் பிரிவுகளுக்கு எதிரானது என்றும், வழக்கு முடியும் வரை பழைய முறைப்படி அச்சிடப்பட்ட ஓட்டுநர் உரிமம் மற்றும் RC ஆவணங்களை வழங்க வேண்டும் என்றும் மனுவில் கோரப்பட்டுள்ளது.
வழக்கை விசாரித்த தலைமை நீதிபதி எஸ்.ஏ. தர்மாதிகாரி, நீதிபதி ஜி. அருள்முருகன் ஆகியோர் அடங்கிய அமர்வு, மனு தொடர்பாக இரண்டு வாரங்களுக்குள் தமிழக அரசு பதிலளிக்க வேண்டும் என உத்தரவிட்டு விசாரணையை ஒத்திவைத்தது.
