ஜப்பானின் ஐச்சி–நகோயாவில் ஆசிய விளையாட்டுப் போட்டிகள் கோலாகலமாகத் தொடங்கியுள்ளன. 45 நாடுகளைச் சேர்ந்த வீரர், வீராங்கனைகள் பங்கேற்றுள்ள இந்தப் போட்டிகள் அக்டோபர் 4-ஆம் தேதி வரை நடைபெறுகின்றன.
இந்நிலையில், மகளிருக்கான 10 மீட்டர் ஏர் ரைபிள் தனிநபர் பிரிவின் இறுதிப் போட்டியில் இந்திய வீராங்கனை இளவேனில் வாலறிவன் சிறப்பாகச் செயல்பட்டார். பரபரப்பாக நடைபெற்ற போட்டியில் இரண்டாவது இடத்தைப் பிடித்த அவர், வெள்ளிப் பதக்கத்தைக் கைப்பற்றி இந்தியாவுக்குப் பெருமை சேர்த்தார்.
இதே இறுதிப் போட்டியில் பங்கேற்ற மற்றொரு இந்திய வீராங்கனையான சோனம் மாஸ்கர் 7-வது இடத்தைப் பிடித்தார்.
முன்னதாக நடைபெற்ற மகளிருக்கான 10 மீட்டர் ஏர் ரைபிள் அணிப் பிரிவில் இளவேனில் வாலறிவன், சோனம் மாஸ்கர் மற்றும் விதார்ஷா வினோத் ஆகியோர் அடங்கிய இந்திய அணி வெள்ளிப் பதக்கம் வென்றது.
இதன்மூலம் அணிப் பிரிவு மற்றும் தனிநபர் பிரிவு என ஒரே நாளில் இரண்டு வெள்ளிப் பதக்கங்களை வென்று இளவேனில் வாலறிவன் அசத்தியுள்ளார். மேலும், துப்பாக்கிச் சுடுதல் போட்டியில் இந்தியாவின் பதக்க எண்ணிக்கையையும் அவர் உயர்த்தியுள்ளார்.
