சேலம்
தமிழகத்தில் எங்கு பார்த்தாலும் ரவுடிகளின் அட்டகாசம், கஞ்சா விற்பனை அதிகரித்து விட்டது. எடப்பாடியார் எப்போது மீண்டும் முதலமைச்சர் ஆவார் என்று பொதுமக்கள் எதிர்பார்க்கின்றனர் என்று சேலம் புறநகர் மாவட்ட கழக செயலாளர் ஆர்.இளங்கோவன் தெரிவித்து உள்ளார்.
விடியா தி.மு.க. அரசை கண்டித்து சேலம் மாவட்டம், ஆத்தூர் அரசு போக்குவரத்து கழக பணிமனை முன்பு சேலம் மண்டல தமிழ்நாடு அரசு போக்குவரத்து கழக அண்ணா தொழிற்சங்கம் சார்பில் கண்டன வாயிற் கூட்டம் நடைபெற்றது.
இக்கூட்டத்தில் போக்குவரத்து தொழிலாளர்களின் 14-வது ஊதிய ஒப்பந்த பேச்சுவார்த்தையில் முன்னாள் முதலமைச்சர் எடப்பாடியார் அரசு இடைக்கால நிவாரணமாக ரூ.1000 வழங்கியதை, தி.மு.க. அரசு குறைத்து 5 சதவீத ரூ.825 என குறைந்த சம்பள உயர்வு வழங்கி தொழிலாளர்களின் வயிற்றில் அடித்த தி.மு.க. அரசை கண்டித்தும்,
போக்குவரத்து கழக நிர்வாகத்தை கண்டித்தும், 13-வது ஊதிய ஒப்பந்தத்தில் குறைந்தபட்சம் முன்னாள் முதலமைச்சர் எடப்பாடியார் ஆட்சியில் ரூ.3500 வழங்கியது போல் வழங்கிட வேண்டி ஓய்வுபெற்ற தொழிலாளர்களின் பணப்பலன்களை உடனே வழங்கிட வேண்டும் என கோஷங்களை முழங்கினர்.
இந்த கண்டன வாயிற்கூட்டத்திற்கு சேலம் மண்டல செயலாளர் சென்னகிருஷ்ணன் தலைமை தாங்கினார். சிறப்பு அழைப்பாளர்களாக சட்டமன்ற உறுப்பினர்கள் ஏ.பி.ஜெயசங்கரன், அ.நல்லதம்பி, கு.சித்ரா ஆகியோர் கலந்து கொண்டனர்.
இந்த வாயிற்கூட்டத்தில் சேலம் புறநகர் மாவட்ட கழக செயலாளரும், தமிழ்நாடு தலைமை கூட்டுறவு வங்கி தலைவருமான ஆர்.இளங்கோவன் முன்னிலை வகித்து பேசியதாவது:-
தி.மு.க. ஆட்சிக்கு வந்து ஓராண்டு காலத்தில் தொழிலாளர்கள் மீது அக்கறை இல்லாத அரசாங்கமாக திகழ்ந்து கொண்டிருக்கிறது. அண்ணா தொழிற்சங்கம் மட்டுமல்ல பொதுமக்களும் வீதி, வீதியாக போராடும் அவல நிலை இந்த ஆட்சியில் ஏற்பட்டு கொண்டிருக்கிறது.
தேர்தலின் போது 100 நாட்களில் தொழிலாளர்களின் கோரிக்கைகள் நிறைவேற்றப்படும் என்று தி.மு.க.வாக்குறுதி கொடுத்துவிட்டு, ஆட்சிக்கு வந்த பிறகு ஒரு பேச்சு பேசுகிறார்கள். 75 சதவீதம் வாக்குறுதிகள் நிறைவேற்றப்பட்டதாக சொல்கிறார்கள். ஆனால் தொழிலாளர்களின் கோரிக்கைகள் எதுவுமே நிறைவேற்றப்படவில்லை. தொழிலாளர்களின் கோரிக்கைகளை நிறைவேற்றும் வேண்டும் என்பதற்காகத்தான் வீதியில் இறங்கி போராடிக்கொண்டிருக்கிறார்கள்.
பெண்களுக்கு இலவச பேருந்து பயணம் என்று சொல்லிவிட்டு சேலம் மாவட்டத்தில் 200 பேருந்து வழித்தடங்கள் நிறுத்தப்பட்டுள்ளன. கழக ஆட்சியில் போக்குவரத்து தொழிலாளர்களுக்கு பாரபட்சமில்லாமல் பணிகள் வழங்கப்பட்டது. ஆனால் தற்போது அண்ணா தொழில் சங்கத்தை சேர்ந்தவர்களுக்கு ஒவ்வொரு நாளும் ஒவ்வொரு வழித்தடத்தில் பணிகள் வழங்கி கஷ்டத்தை கொடுக்கிறார்கள்.
2021-ம் ஆண்டு 14-வது ஊதிய ஒப்பந்த பேச்சுவார்த்தைக்கு எதிராக தி.மு.க.வின் தூண்டுதல் பெயரில் பல்வேறு போராட்டங்களை நடத்தி பொதுமக்களுக்கு இடையூறாக இருந்தனர். 23.05.2022-ல் சம்பள உயர்வில் ரூ.825 க்கு மட்டுமே தி.மு.க. அரசு ஒப்புக்கொண்டுள்ளது.
சி.ஐ.டி.யு. தொழிற்சங்கம் அதைப்பற்றி கேட்கவே இல்லை. தி.மு.க. ஆட்சிக்கு வந்த பின்னர் தமிழகம் முழுவதும் ரவுடிகளின் அட்டகாசம் அதிகரித்துள்ளது. எங்கு பார்த்தாலும் வன்முறை அதிகரித்துள்ளது. எங்கு பார்த்தாலும் கஞ்சா மற்றும் கள்ளச்சாராயம் விற்பனை அதிகரித்துள்ளது என்று தி.மு.க.வினரே புகார் தெரிவிக்கின்றனர்.
எடப்பாடியார் எப்போது முதலமைச்சராக வருவார் என்று இன்றைக்கு தி.மு.க.வினரே கேட்டுக்கொண்டே இருக்கின்றனர். ஏனென்றால் தி.மு.க. தொழிற்சங்கத்தினர் அந்தளவுக்கு பாதிக்கப்பட்டுள்ளனர். பொதுமக்களின் நலனை கருதியும், ஓட்டுநர் மற்றும் நடத்துநர் நலனை கருதியும் 3500 பேருந்துகளை கழக அரசின் போது எடப்பாடியார் இயக்கினார். கழக ஆட்சியின் போது எடப்பாடியார் கட்சி பாகுபாடு இல்லாமல் ஒற்றுமையாக அனைவரும் பணியாற்ற வேண்டும் என்று கூறினார்.
இன்றைக்கு சேலத்தில் திமுகவை சேர்ந்த ஒரே ஒரு சட்டமன்ற உறுப்பினர் உள்ளார். அவர் சொல்வதைத்தான் போக்குவரத்து பணிமனை இயக்குனர் கேட்கிறார். இது வன்மையாக கண்டிக்கத்தக்கது.
இரவென்றும் பகலென்றும் பாராமல் உழைக்கின்ற ஒரே தொழிற்சங்கத்தினர் அண்ணா தொழிற்சங்கத்தினர் மட்டுமே, மீண்டும் தமிழகத்தை ஆள பிறந்த ஒரே முதலமைச்சராக எடப்பாடியார் தான்.
ஆகவே தொழிற்சங்கத்தினர் மற்றும் கழகத்தினர் அனைவரும் இரவு பகல் என்று பாராமல் உழைத்து மீண்டும் முதலமைச்சர் அரியணையில் எடப்பாடியாரை அமர வைக்க வேண்டுமென்று கேட்டுக்கொள்கிறேன்.
இவ்வாறு சேலம் புறநகர் மாவட்ட கழக செயலாளரும், தமிழ்நாடு தலைமை கூட்டுறவு வங்கி தலைவருமான ஆர்.இளங்கோவன் பேசினார்.
